Hyd: పెళ్లైన ఆర్నెల్లకే నూరేళ్లు.. బిల్డింగ్ పైనుంచి దూకి..

పెళ్లైన ఆర్నెల్లకే యువతి ఆత్మహత్య చేసుకుంది. ఐదో అంతస్తు నుంచి దూకి ఆమె బలవన్మరణానికి పాల్పడింది. ఈ విషాద ఘటన హైదరాబాద్‌లో జరిగింది. కరీంనగర్‌‌కి చెందిన శ్రీవిద్య(27)కి వరంగల్‌కి చెందిన శబరీష్‌తో ఐదు నెలల కిందట వివాహం జరిగింది. ఇటీవల ఉద్యోగరీత్యా భర్త బెంగళూరు వెళ్లడంతో ఆమె చందానగర్‌లో ఉంటున్న వారింటికి వెళ్లింది. మధ్యాహ్నం సమయంలో భర్తతో ఫోన్ మాట్లాడుతూ గొడవపడినట్టు తెలుస్తోంది.

క్షణికావేశంలో శ్రీవిద్య బిల్డింగ్ ఐదో అంతస్తు నుంచి అమాంతం దూకేసింది. గమనించిన స్థానికులు, కుటుంబ సభ్యులు వెంటనే ఆమెను నగరంలోని ఓ ప్రైవేట్ ఆస్పత్రికి తీసుకెళ్లారు. అక్కడ చికిత్స పొందుతూ ఆమె ప్రాణాలు విడిచింది. కూతురి మరణవార్త తెలుసుకున్న ఆమె కుటుంబ సభ్యులు కన్నీరుమున్నీరయ్యారు. భర్త శబరీష్ వేధింపుల కారణంగానే శ్రీవిద్య ఆత్మహత్య చేసుకుందని ఆరోపించారు. సమాచారం అందుకున్న పోలీసులు మృతదేహాన్ని పోస్ట్‌మార్టం నిమిత్తం ఉస్మానియా ఆస్పత్రికి తరలించారు. మృతురాలి కుటుంబ సభ్యుల ఫిర్యాదు మేరకు కేసు నమోదు చేసి దర్యాప్తు చేపట్టారు.

Also Read: ఆ ఒక్కమాటే శాపం.! చెల్లెలిపై అత్యాచారం, నలుగురిని నరికి దారుణ హత్య