మహిళ శరీరంలో విషం.. చిత్తూరులో మిస్టరీగా మరణం.. హత్యా?

చిత్తూరు జిల్లాలో వివాహిత మరణం మిస్టరీగా మారింది. అత్తింటి వేధింపులు భరించలేక పుట్టింటికి వెళ్లిపోయిన భార్యని బతిమాలి వెనక్కి తీసుకొచ్చాడు. సరిగ్గా నెల రోజులు తిరగకముందే ఆమె అనుమానాస్పద స్థితిలో ప్రాణాలు కోల్పోయింది. అపస్మారక స్థితిలో ఉన్న వివాహితను ఆస్పత్రికి తీసుకెళ్లేలోపే మృతి చెందింది. అయితే ఆమె శరీరంలో విషం ఆనవాళ్లు ఉండడం కలకలం రేపుతోంది. విషప్రయోగం చేసి చంపేశారా? లేక ఆత్మహత్య చేసుకుందా? అనే అనుమానాలు వ్యక్తమవుతున్నాయి. రామకుప్పం మండలం కొంగనపల్లెలో ఈ ఘటన జరిగింది.

కర్ణాటకలోని కేజీఎఫ్ తాలూకా నెర్ణహళ్లికి చెందిన వీణ(21)కి కొంగనపల్లెకి చెందిన శివతో ఏడాదిన్నర కిందట వివాహమైంది. కొద్దికాలం సాఫీగానే సాగిన కాపురంలో కలహాలు రేగాయి. ఇంటి స్థలం కొనేందుకు పుట్టింటి నుంచి అదనపు కట్నం తీసుకురావాలని అత్తింటి వారు వేధించడం మొదలుపెట్టారు. భర్త, అతని కుటుంబ సభ్యుల వేధింపులు భరించలేపోయిన వీణ నాలుగు నెలల కిందట పుట్టింటికి వెళ్లిపోయింది.

నెల రోజుల కిందట అత్తింటికి వెళ్లిన శివ.. భార్యను బాగా చూసుకుంటానని చెప్పి ఇంటికి తీసుకొచ్చాడు. ఏమైందో ఏమో అనూహ్యంగా ఆమె తెల్లవారుజామున అపస్మారక స్థితిలో కనిపించింది. కుటుంబ సభ్యులు గమనించి ఆమెను ఆస్పత్రికి తరలిస్తుండగా మార్గంమధ్యలో మృతి చెందింది. విషయం తెలుసుకున్న వీణ కుటుంబ సభ్యులు అల్లుడిపై అనుమానాలు వ్యక్తం చేశారు. భర్త, అతని కుటుంబ సభ్యులే తన కూతురిని హత్య చేశారని మృతురాలి తల్లి పోలీసులకు ఫిర్యాదు చేశారు.

Also Read: ‘వచ్చి అరెస్టు చేయండి.. వెయిట్ చేస్తుంటా’.. పోలీసులకు యువతి షాకింగ్ ఫోన్ కాల్

వీణ అపస్మారక స్థితికి వెళ్లి మృత్యువాతపడడంపై పలు అనుమానాలు వ్యక్తమవుతున్నాయి. విషప్రయోగం వల్లే ఆమె ప్రాణాలు కోల్పోయిందని కుప్పం ఏరియా ఆస్పత్రి వైద్యులు చెప్పినట్లు స్థానిక పోలీసులు తెలిపారు. అయితే ఆమెకు విషమిచ్చి హత్య చేశారా? లేక ఆమె విషం తాగి ఆత్మహత్యాయత్నం చేసిందా? అనే విషయాలపై స్పష్టత రావాల్సి ఉంది. పోలీసులు కేసు నమోదు చేసి దర్యాప్తు చేపట్టారు. విచారణలో అసలు నిజాలు నిగ్గుతేలాల్సి ఉంది.

Read Also: పుట్టింటి వాళ్లు బంగారం పెడితేనే సీమంతం.! హైదరాబాద్‌లో గర్భిణి ఆత్మహత్య