టీవీ చూస్తున్నందుకు మందలించిన తండ్రి.. ఉరేసుకున్న యువతి

‘రోజంతా టీవీ చూస్తూనే ఉంటావా... త్వరలో ఉద్యోగాల నోటిఫికేషన్‌ ఉంది. బాగా ప్రిపేర్ అయి మంచి ఉద్యోగం సాధించు’ అని తండ్రి మందిలించాడన్న మనస్తాపంతో యువతి ఆత్మహత్య చేసుకున్న ప్రకాశం జిల్లా పామూరులో జరిగింది. మండలంలోని బొట్లగూడూరు గ్రామ పంచాయతీ పరిధిలోని కొత్తపల్లె గ్రామానికి చెందిన చీమలదిన్నె మాధవరావు, పద్మ దంపతులకు ఇద్దరు పిల్లలు. కుమార్తె దేవీ ప్రసన్న(20) ఒంగోలులో బీఎస్సీ(అగ్రికల్చర్), కొడుకు విజయవాడలో ఇంటర్మీడియట్ చదువుతున్నాడు. లాక్‌డౌన్ కారణంగా పిల్లలు రెండున్నర నెలలుగా ఇంట్లోనే ఉంటున్నారు.

Also Read: బాలిక స్నానం చేస్తుండగా వీడియో తీసి.. కోరిక తీర్చాలంటూ వేధింపులు

శనివారం రాత్రి టీవీ చూస్తున్న ప్రసన్నను తండ్రి మాధవరావు మందలించాడు. ఉదయం నుంచి రాత్రి వరకు టీవీ చూస్తూనే ఉంటావా, త్వరలో ఉద్యోగాల నోటిఫికేషన్ వస్తోంది, బాగా చదివి ఉద్యోగం సాధించు అని తిట్టాడు. ఆ తర్వాత అందరూ భోజనం చేసి పడుకున్నారు. ఆదివారం తెల్లవారుజామున పద్మ నిద్రలేచి చూడగా ప్రసన్న గదిలో ఫ్యాన్‌కు వేలాడుతూ కనిపించింది. దీంతో ఆమె కేకలు వేయగా మాధవరావు వెంటనే లేచి కూతురిని కిందికి దించి చూడగా అప్పటికే చనిపోయింది. ఈ ఘటనపై సమాచారం అందుకున్న ఎస్ఐ అంబటి చంద్రశేఖర్ సిబ్బందితో కలిసి సంఘటనా స్థలానికి చేరుకుని పరిశీలించారు. మృతురాలి తల్లి ఇచ్చిన ఫిర్యాదు మేరకు కేసు నమోదుచేసి దర్యాప్తు చేపట్టారు. ప్రసన్న మృతదేహాన్ని పోస్టుమార్టం నిమిత్తం కనిగిరి ప్రభుత్వాసుపత్రికి తరలించారు.

Also Read: 40 మంది మహిళలపై అత్యాచారం.. ఏడేళ్లకు చిక్కిన సీరియల్ రేపిస్ట్