పక్కోడికి సాయం చేయబోయి కొత్త పెళ్లికొడుకు మృతి.. నెల్లూరులో విషాదం

పక్కోడికి సాయం చేయబోయిన యువకుడు ప్రమాదవశాత్తూ ప్రాణాలు కోల్పోయిన విషాద ఘటన చోటుచేసుకుంది. పెళ్లి జరిగి నెల రోజులు తిరక్కుండానే భర్త మరణించాడని తెలియడంతో ఆ భార్య హతాశురాలైంది. ఈ ఘటన నెల్లూరు జిల్లాలో జరిగింది. మనుబోలు మండలం బండేపల్లికి చెందిన రాజయ్యకి ఒక్కగానొక్క కుమారుడు అంకయ్య(27). తమ పొలం సాగు చేసుకోవడంతో పాటు ట్రాక్టర్ ‌డ్రైవర్‌గా పనిచేసేవాడు. గత నెల 21న గూడూరుకి చెందిన మౌనికతో అంకయ్యకి వివాహమైంది.

రోజు మాదిరిగానే పొలం పనులకు వెళ్లిన అంకయ్య విగతజీవిగా మారాడు. తమ పక్క పొలం దుక్కి దున్నుతుండగా ట్రాక్టర్ బురదలో ఇరుక్కుపోయింది. ట్రాక్టర్ నడిపే అనుభవం ఉండడంతో పక్క పొలం వారు అక్కడే ఉన్న అంకయ్యను సాయం కోరారు. సరేనన్న అంకయ్య ట్రాక్టర్‌ను బయటకు తీసే క్రమంలో తిరగబడడంతో ప్రాణాలు కోల్పోయాడు. ట్రాక్టర్ బోల్తా కొట్టి మీద పడడంతో బురదలో కూరుకుపోయి మృతి చెందాడు. వెంటనే సమీపంలోని పొలాల్లో పనిచేస్తున్న కూలీలు, రైతులు వచ్చి అంకయ్య మృతదేహాన్ని బయటికి తీశారు. పెళ్లైన నెలరోజులకే భర్త మరణంతో భార్య కన్నీటిపర్యంతమైంది. ఈ ఘటనతో గ్రామంలో విషాదచాయలు అలుముకున్నాయి.

Also Read: