ఆమె లేని జీవితం వద్దు.. యువతి సమాధి వద్ద ప్రియుడి ఆత్మహత్య

ప్రాణం కంటే మిన్నగా ప్రేమించిన అమ్మాయి లేని లోకంలో తాను ఉండలేను అనుకున్నాడు. ఆమె మృతిని తట్టుకోలేక ఆత్మహత్య చేసుకున్నాడు. మరణించిన తర్వాతైనా తనను కలవాలనుకున్నాడేమో.. ఆమె సమాధి వద్దే ఉరేసుకొని ప్రాణాలు తీసుకున్నాడు. ఈ విషాద ఘటన జయశంకర్‌ భూపాలపల్లి జిల్లా మహదేవపూర్‌ మండలం కుదురుపల్లిలో చోటు చేసుకుంది. పోలీసులు, స్థానికులు తెలిపిన వివరాల ప్రకారం..

మహదేవపూర్‌ గ్రామానికి చెందిన చల్లా మహేశ్‌ (24) తెలంగాణ స్టేట్‌ మినరల్‌ డెవలప్‌మెంట్ కార్పొరేషన్‌ (TSMDC)లో వాలంటీర్‌గా పనిచేస్తున్నాడు. అతడు కొంత కాలంగా అదే గ్రామానికి చెందిన ఓ యువతిని ప్రేమిస్తున్నాడు. అయితే.. ఆమె ఇటీవల అనారోగ్యంతో మృతి చెందింది. ప్రాణంగా ప్రేమించిన యువతి మృతితో మహేశ్‌ తీవ్ర మనస్తాపానికి గురయ్యాడు. ఆమె లేని జీవితం ఇక తనకు వద్దనుకున్నాడు.

ఆదివారం (అక్టోబర్ 25) ఉదయం ఎప్పటిలాగే ఉద్యోగ విధుల నిమిత్తం ఇంటి నుంచి బయటకు వెళ్లిన మహేశ్‌‌.. తాను ప్రాణంగా ప్రేమించిన ఆ అమ్మాయి లేని లోకంలో ఉండలేనంటూ వాట్సాప్‌ స్టేటస్‌ పెట్టుకున్నాడు. ఆ స్టేటస్‌ చూసిన అతడి స్నేహితులు వెంటనే కుటుంబ సభ్యులకు సమాచారం అందించారు. గ్రామస్థులతో కలిసి గాలించగా.. అతడు ఆ యువతి సమాధి వద్ద ఓ చెట్టు వద్ద ఉరికి వేలాడుతూ కనిపించాడు.


మహేశ్‌ మృతితో అతడి కుటుంబసభ్యులు కన్నీరు మున్నీరుగా విలపిస్తున్నారు. పండగ రోజే చోటు చేసుకున్న ఈ ఘటన గ్రామంలో తీవ్ర విషాదం నింపింది. సమాచారం అందుకున్న మహదేవ‌పూర్‌ ఎస్‌ఐ అనిల్‌ కుమార్‌ ఘటనా స్థలానికి వచ్చి పరిశీలించారు. మృతదేహాన్ని పోస్టుమార్టం నిమిత్తం మహదేవపూర్‌ ప్రభుత్వ హాస్పిటల్‌కు తరలించారు.

Don't Miss: ఎంత ఘోరం.. బతికుండగానే ఫ్రీజర్‌లో పెట్టారు, ఊపిరాడక మృతి

Must Read: అమ్మాయిల పెళ్లి వయసు పెంపు.. త్వరలోనే నిర్ణయం

Also Read: ప్రయాణ హడావుడి.. బిడ్డను ట్యాక్సీలోనే మరచిపోయిన దంపతులు!