Fact Check: సెంట్రల్ బ్యాంక్ కేవైసీ కోసం NPR సర్టిఫికెట్ తప్పనిసరా?

కేవైసీ కోసం ఖాతాదారులు సంబంధిత డాక్యుమెంట్లు సమర్పించాలని సెంట్రల్ బ్యాంక్ ఆఫ్ ఇండియా దినపత్రికల్లో ఇచ్చిన ప్రకటన అనేక అనుమానాలకు తావిచ్చింది. కేవైసీ కోసం సమర్పించిన డాక్యుమెంట్ల జాబితాలో నేషనల్ పాపులేషన్ రిజిస్టర్ (ఎన్‌పీఆర్) ధ్రువీకరించిన లేఖను సైతం పేర్కొనడమే దీనికి కారణం. సాధారణంగా బ్యాంకులు కేవైసీ కోసం ఆధార్ కార్డ్, ఓటర్ ఐడీ, డ్రైవింగ్ లైసెన్స్, గ్రామీణ ఉపాధి హామీ పథకానికి సంబంధించిన జాబ్ కార్డ్‌ తదితరాల్లో ఏదో ఒక గుర్తింపు కార్డును సమర్పించాలని కస్టమర్లకు సూచిస్తాయి. కానీ ఈ జాబితాలో ఎన్‌పీఆర్ ధ్రువీకరించిన లేఖను కూడా చేర్చడంతో చాలా మంది ఆందోళనకు లోనయ్యారు.

పౌరసత్వ సవరణ చట్టాన్ని నిరసిస్తూ దేశవ్యాప్తంగా నిరసన ప్రదర్శనలు జరుగుతుండటంతో.. కేవైసీ డాక్యుమెంట్ల జాబితాలో ఎన్‌పీఆర్ ధ్రువీకరణ లేఖ ప్రస్తావన తేవడమే ఈ ఆందోళనలకు కారణం. ఎన్‌పీఆర్ లేఖ లేకపోతే పరిస్థితి ఏంటని కొందరు ఆందోళన చెందారు. సోషల్ మీడియాలోనూ ఈ యాడ్ వైరల్ అయ్యింది. కొందరైతే సెంట్రల్ బ్యాంక్ ఖాతాల నుంచి డబ్బులు విత్ డ్రా చేసుకోవడం కోసం సిద్ధపడ్డారు.

ఈ విషయమై పూర్తి వివరాలను తెలుసుకోవడం కోసం సెంట్రల్ బ్యాంక్ వర్గాలను సమయం సంప్రదించింది. ‘‘ఇది మన రాష్ట్రం కోసం ఉద్దేశించినది కాదు. అసోం లాంటి రాష్ట్రాల్లో ఆధార్ లాంటి ధ్రువీకరణ పత్రాలు లేని వారు ఎన్‌పీఆర్ ధ్రువీకరణ లేఖను సమర్పించడం ద్వారా కేవైసీని పూర్తి చేయొచ్చు. తెలుగులో వచ్చిన ఈ యాడ్ దాదాపుగా దేశంలోని అన్ని భాషల్లో వచ్చింది. ముంబైలోని సెంట్రల్ బ్యాంకు హెడ్ ఆఫీస్ పంపిన ప్రకటనను తెలుగులోకి యథాతథంగా అనువదించారు. దీంతో ఏపీలోని కర్నూలు ఎడిషన్లోనూ.. కేవైసీ డాక్యుమెంట్ల జాబితాలో ఎన్‌పీఆర్ లేఖ ప్రస్తావన కనిపించింది. దీని వల్ల బ్యాంకు కస్టమర్లకు ఉపయోగమే కానీ ఎలాంటి నష్టం లేద’’ని సంబంధిత వర్గాలు ‘సమయం’కు తెలిపాయి.