ఢిల్లీ ఎన్నికల్లో బీజేపీ 100 కంటే తక్కువ ఓట్ల తేడాతో 8 స్థానాల్లో ఓడిందా?

క్లెయిమ్: ఢిల్లీ అసెంబ్లీ ఎన్నికల్లో 100 ఓట్లకన్నా తక్కువ తేడాతో బీజేపీ 8 స్థానాల్లో ఓడిందని.. 1000 ఓట్ల తేడాతో 19 స్థానాలను, 2000 ఓట్లలోపు తేడాతో 9 సీట్లను చేజార్చుకుందని సోషల్ మీడియాలో ప్రచారం జరుగుతోంది. మరో 3 శాతం అదనంగా ఓటింగ్ జరిగితే బీజేపీకి పూర్తి అనుకూలంగా ప్రజాతీర్పు వచ్చేదని.. ఆ పార్టీ 44 స్థానాల్లో గెలిచేదనేది ఆ మెసేజ్ సారాంశం. ట్విట్టర్, వాట్సాప్‌లలో ఈ మెసేజ్ వైరల్‌గా మారింది.
నిజం: ఈ ప్రచారం అబద్ధం. 2 వేల లోపు ఓట్ల తేడాతో బీజేపీ కేవలం రెండు సీట్లలో మాత్రమే ఓడింది.

నిర్ధారణ, ప్రక్రియ: ‘Delhi elections margin’ అని గూగుల్‌లో వెతకగా.. ఢిల్లీ ఎన్నికల్లో 13 స్థానాల్లో 7 వేలలోపు ఓట్ల తేడాతో అభ్యర్థులు గెలిచారని హిందుస్థాన్ టైమ్స్ ప్రచురించిన వార్త కనిపించింది. ఈ 13 స్థానాల్లో బిజ్వాసాన్, ఆదర్శ్ నగర్‌లలో మాత్రమే బీజేపీ 2 వేల కంటే తక్కువ ఓట్ల తేడాతో ఓడింది. బిజస్వాన్ నియోజకవర్గంలో ఆప్ అభ్యర్థి, లాయర్ భూపేందర్ సింగ్ జూన్.. బీజేపీ అభ్యర్థి ప్రకాశ్ రాణాను 753 ఓట్ల తేడాతో ఓడించారు.
ఆదర్శ్ నగర్‌లో ఆప్ అభ్యర్థి పవన్ శర్మ.. బీజేపీ అభ్యర్థి రాజ్ కుమార్ భాటియాపై 1589 ఓట్ల తేడాతో విజయం సాధంచారు. వీరిద్దరూ కొత్తవారే. ఎన్నికల సంఘం అధికారిక వెబ్‌సైట్‌లో పరిశీలించాక.. బీజేపీ రెండు స్థానాలను మాత్రమే 2 వేల కంటే తక్కువ ఓట్ల తేడాతో ఆప్‌కు కోల్పోయిందని నిర్థారించుకున్నాం.
ఢిల్లీ ఎన్నికల్లో ఓడిన, గెలిచిన అభ్యర్థుల మధ్య స్వల్ప అంతరం 753 ఓట్లని ఇది రుజువు చేస్తోంది. వంద కంటే తక్కువ ఓట్ల తేడాతో బీజేపీ ఒక్క సీటు కూడా కోల్పోలేదు.

వర్డిక్ట్: ఢిల్లీ అసెంబ్లీ ఎన్నికల్లో వంద కంటే తక్కువ ఓట్ల తేడాతో బీజేపీ 8 సీట్లు ఓడిందనే ప్రచారం తప్పని టైమ్స్ ఫ్యాక్ట్ చెక్ గుర్తించింది.