Fact Check: మున్సిపల్ కార్పొరేషన్ పరిధిలో హెల్మెట్ ధరించడం తప్పనిసరి కాదా?

విషయం: మోటారు వాహనాల సవరణ చట్టం-2019 గత నెలలో అమలులోకి వచ్చిన తర్వాత వాహనదారులు జరిమానాలు చెల్లించలేక గగ్గోలు పెడుతున్నారు. ట్రాఫిక్ రూల్స్ ఉల్లంఘించిన కారణంగా ఒకేసారి అరవై వేలు, డెబ్బై వేలు చలాన్లు వాహనదారులకు విధించిన విషయం తెలిసిందే. ఈ క్రమంలో పలు రాష్ట్రాల్లో జరుగుతున్న హెల్మెట్ తనిఖీలను కోర్టు తిరస్కరించిందని, మున్సిపల్ కార్పొరేషన్ పరిధిలో వాహనదారులు హెల్మెట్ ధరించాల్సిన అవసరం లేదని.. కేవలం రాష్ట్ర, జాతీయ రహదారుల మార్గాల్లో తప్పనిసరి అని సాగర్ కుమార్ జైన్ పిటిషన్ ద్వారా వెల్లడైందని న్యాయవాది దేవేంద్ర ప్రతాప్ సింగ్ చౌహాన్ చేసినట్లుగా ఉన్న పోస్ట్ హాట్ టాపిక్‌గా మారింది. వాట్సాప్, ఫేస్ బుక్ ఇతర సామాజిక మాధ్యమాలలో ఈ వదంతి షేర్ అవుతోంది.

నిజం: మున్సిపల్ కార్పొరేషన్ పరిధిలో హెల్మెట్ ధరించడం తప్పనిసరి కాదంటూ తన పేరిట వైరల్ అవుతున్న పోస్ట్‌లో నిజం లేదని, అది ఫేక్ మెస్సేజ్ అని న్యాయవాది దేవేంద్ర ప్రతాప్ సింగ్ గతంలోనే పోస్ట్ చేశారు. కానీ తాజాగా ఆ ఫేక్ పోస్ట్ సమాచారాన్ని నెటిజన్లు విపరీతంగా షేర్ చేస్తున్నారు.

పరిశీలన: devendra pratap singh chauhan helmet అనే కీవర్డ్స్‌తో గూగుల్‌లో సెర్చ్ చేయగా.. లాయర్ దేవేంద్ర ప్రతాప్ సింగ్ చౌహాన్ వివరణ ఇస్తూ పోస్ట్ చేసిన వీడియో దర్శనమిస్తుంది.
మున్సిపల్ కార్పొరేషన్ పరిధిలో వాహనదారులు హెల్మెట్ వాడకం తప్పనిసరి కాదని, పోలీసులు నిబంధనలు ఉల్లంఘిస్తున్నారని తాను ఏ పోస్ట్ చేయలేదని పేర్కొన్నారు. మోటారు వాహనాల సవరణ చట్టం 2019లో హెల్మెట్‌కి సంబంధించి మినహాయింపును ప్రస్తావించలేదు. కోర్టులు సైతం దీనిపై మినహాయింపు ఉన్నట్లు తీర్పులు వెల్లడించలేదు.
Also Read: సముద్రంలో మునిగిన ద్వారక నగరం ఫొటోలు ఇవేనా?


నిర్ధారణ: మున్సిపల్ కార్పొరేషన్ ప్రాంతాల్లో హెల్మెట్ ధరించడం తప్పనిసరి కాదని వస్తున్న వార్తల్లో నిజం లేదు. న్యాయవాది దేవేంద్ర ప్రతాప్ సింగ్ పేరిట గతంలో వైరల్ అయిన ఫేక్ పోస్ట్ వివరాలు మరోసారి నెట్టింట హల్ చల్ చేస్తున్నాయి. తాను దీనిపై ఏ పోస్ట్ చేయలేదని, ఆ వార్తను నమ్మవద్దని ఆయన గతంలోనే వివరణ ఇచ్చిన విషయం విధితమే. మోటారు వాహనాల సవరణ చట్టం అమల్లోకి రాకముందే ఆ వదంతి ప్రచారం కావడం గమనార్హం.
Also Read: విశాఖలో చిరుత? ఇంట్లోకి చొరబడి కుక్కపై దాడి, ఒకే పులి అన్నిచోట్ల ఎలా?