పదేళ్ల బాలికపై నెలల తరబడి 12 ఏళ్ల బాలుడి అత్యాచారం.. గర్భం దాల్చిన బాలిక

పదేళ్ల అమ్మాయి 12 ఏళ్ల అబ్బాయి చేతిలో పదే పదే అత్యాచారానికి గురైంది. ఫలితంగా అభం శుభం తెలియని వయసులో ఆ బాలిక గర్భం దాల్చింది. మహారాష్ట్రలోని పాల్ఘర్ జిల్లాలో వెలుగు చూసిన ఈ ఘటన సంచలనం రేపుతోంది. మైనర్లయిన ఇద్దరూ ఇరుగు పొరుగు ఇళ్లలో ఉంటున్నారు. గత నాలుగు నెలలుగా ఆ అబ్బాయి.. అమ్మాయిపై అత్యాచారానికి పాల్పడుతున్నాడని పోలీసులు తెలిపారు.

కొద్ది రోజుల క్రితం కడుపులో నొప్పిగా ఉందని బాలిక చెప్పడంతో ఈ వ్యవహారం వెలుగు చూసింది. వైద్య పరీక్షలు నిర్వహించగా.. ఆ పాప గర్భం దాల్చిందని డాక్టర్లు తెలిపారు. దీంతో షాకైన తల్లిదండ్రులు ఆరా తీయగా.. బాలిక అసలు విషయం చెప్పింది. తమ చిన్నారిని గర్భవతి చేసిన 12 ఏళ్ల బాలుడిపై ఆమె కుటుంబ సభ్యులు పోలీసులకు ఫిర్యాదు చేశారు.