భలే బామ్మ.. వయస్సు 105 ఏళ్లు.. పరుగు పందెంలో ఫస్ట్

వయస్సు మీద పడిందని బాధపడేవాళ్లకి ఓ బామ్మ స్ఫూర్తిగా నిలిచింది. 105 ఏళ్ల వయస్సులో పరుగు పందెంలో ఫస్ట్ వచ్చింది. హర్యానాలోని చర్కిదాద్రికి చెందిన రామ్ బాయి.. ఈ ఘనతను దక్కించుకుంది. గత వారం నేషనల్ అథ్లెటిక్స్ ఫెడరేషన్ ఆఫ్ ఇండియా నిర్వహించిన నేషనల్ ఓపెన్ మాస్టర్స్ అథ్లెటిక్స్ ఛాంపియన్‌షిప్‌లో 100 మీటర్ల రేసును కేవలం 45.40 సెకన్లలో పూర్తి చేసింది. అంతేకాదు ఆమె స్ప్రింట్స్‌లో గోల్డెన్ డబుల్‌ని కూడా సాధించింది. ఆ తర్వాత ఆదివారం ఒక నిమిషం 52.17 సెకన్లలో 200 మీటర్ల రేసును పూర్తి చేసింది.

వందేళ్లు పైబడిన మహిళలకు మాత్రమే ఈ రేసును నిర్వహించారు. రామ్ బాయి మొదటి స్థానంలో నిలిచిన రేసులో 85 ఏళ్లు పైబడిన వారు ఎవరూ పాల్గొనలేదు. అలాంటిది 105 ఏళ్ల రామ్ బాయి పరుగు పందెంలో పాల్గొని.. కప్పుతో పాటు బంగారు పతకాన్ని గెలుచుకుని అందరిని ఆశ్చర్యపరిచింది. దీంతో ఆమెతో సెల్ఫీలు దిగేందుకు అందరూ పోటీ పడ్డారు. ఈ సందర్భంగా రామ్ బాయి మాట్లాడుతూ ఇది ఒక గొప్ప అనుభూతి అని అన్నారు. కాగా నవంబర్ 2021లో పరుగు పెట్టడం ప్రారంభించింది.


అయితే ఈ వయస్సులో కూడా ఆమె ఇంత బలంగా ఉండడానికి ఆమె జీవన శైలే కారణం. ఉదయం ఐదు గంటలకు నిద్ర లేస్తారు. నాలుగు కిలోమీటర్లు రన్నింగ్ చేస్తారు. పాలు, పెరుగు, 250 గ్రాముల నెయ్యి ఆమె భోజనంలో కచ్చితంగా ఉంటాయి. అయితే రామ్ బాయి కుటుంబంలో అందరూ మంచి క్రీడాకారులే. వాళ్లు కూడా ఎన్నో పతకాలు సాధించారు. రామ్ బాయి కుమార్తె సంత్రాదేవి (62) రిలే రేసులో స్వర్ణ పతకం సాధించారు. సంత్రాదేవి కుమారులు ముఖ్తార్ సింగ్, వధు భతేరిలు కూడా 200 మీటర్ల రేసులో కాంస్య పతకాలను గెలుచుకున్నారు.