15 ఏళ్ల బాలికని తల్లిని చేసిన 13 ఏళ్ల బాలుడు అరెస్ట్

పక్కింట్లో వుంటున్న 15 ఏళ్ల బాలికను తల్లిని చేసిన కేసులో ఓ 13 ఏళ్ల బాలుడిని పోలీసులు అరెస్ట్ చేసిన విచిత్రమైన ఘటన ఇది. బాధితురాలి ఫిర్యాదు మేరకు గురువారం బాలుడిని అరెస్ట్ చేసిన పఠానపురం పోలీసులు అతడిని కొళ్లం చీఫ్ జుడిషియల్ మెజిస్ట్రేట్ ముందు హాజరుపరిచారు. ఆ జిల్లాకి జువెనైల్ జస్టిస్ బోర్డ్ చైర్మన్‌గానూ వున్న న్యాయమూర్తి ఆ బాలుడికి బెయిల్ మంజూరు చేసి అతడిని తల్లిదండ్రులతో ఇంటికి పంపించేశారు. వినడానికి కాస్త విడ్డూరంగానే వున్న ఈ ఘటన కేరళలోని కొళ్లంలో చోటుచేసుకుంది.

పోలీసులు వెల్లడించిన వివరాల ప్రకారం నాలుగు రోజుల క్రితమే ఈ కేసు నమోదైంది. 9వ తరగతి చదువుతున్న బాలికకు కడుపు నొప్పి రావడంతో బాలిక తల్లి ఆమెని ఆస్పత్రికి తీసుకెళ్లింది. అక్కడ బాలికకు వైద్య పరీక్షలు నిర్వహించిన వైద్యులు ఆమె నిండు గర్భిని అని నిర్ధారిస్తూ మరో హాస్పిటల్‌కి సిఫార్సు చేశారు. అయితే, అక్కడి నుంచి ఇంటికి తిరిగొచ్చిన బాలిక ఇంట్లోనే శిశువుకి జన్మనిచ్చింది.

ప్రసవం అనంతరం బాలిక చేసిన ఫిర్యాదు మేరకు కేసు నమోదు చేసిన పోలీసులు చుట్టాల ఇంటికెళ్లిన బాలుడిని బుధవారం ఇంటికి పిలిపించారు. మఫ్టీలోనే బుధవారంనాడు బాలుడి ఇంటికి వెళ్లిన పోలీసులు అతడి నుంచి వాంగ్మూలం తీసుకున్నారు. బాధితురాలితో పలుసార్లు శృంగారంలో పాల్గొన్నట్టుగా పోలీసుల ఎదుట అంగీకరించాడు ప్రస్తుతం 8వ తరగతి చదువుతున్న ఆ బాలుడు.

డీఎన్ఏ పరీక్ష కోసం బాలుడి తల్లిదండ్రుల అనుమతితో అతడి రక్త నమూనాని సేకరించారు పోలీసులు. బాలుడు, బాలిక ఇద్దరూ మైనర్లే కావడంతో చట్టరీత్యా చర్యలు తీసుకోవడానికన్నా ముందు న్యాయ సలహా తీసుకోవాలని భావిస్తున్నట్టు పఠానపురం సీఐ ఎస్ నందకుమార్ తెలిపారు.