ఎండ వేడికి 15 కార్లు కాలి బూడిదయ్యాయి

ఎండల వేడి తీవ్రత ఎలా వుందో చాటిచెప్పేందుకు ప్రత్యక్ష ఉదాహరణే ఈ ఘటన. ముంబైలోని కుర్లాకి సమీపంలోని స్కైలైన్ ఓయాసిస్ కోఆపరేటివ్ హౌసింగ్ సోసైటీ అపార్ట్‌మెంట్ పార్కింగ్‌లో వేడిమి కారణంగా చెలరేగిన అగ్ని ప్రమాదంలో 15 కార్లు కాలి బుగ్గిపాలయ్యాయి. 13 అంతస్తుల బిల్డింగ్‌లో అగ్ని ప్రమాదం చోటుచేసుకుందని ఆదివారం తెల్లవారుజామున 5 గంటలకి అగ్నిమాపక శాఖ కంట్రోల్ రూమ్‌కి ఓ ఫోన్ వచ్చింది. అగ్నిమాపక సిబ్బంది ఘటనాస్థలానికి చేరుకునేలోపే 15 కార్లు కాలిబూడిదయ్యాయి.

కాలిపోయిన కార్లలో బీఎండబ్ల్యూ, ల్యాండ్ రోవర్ డిస్కవరీ, హోండా అకార్డ్, టొయొటా ఇన్నోవా, వ్యాగనార్ వంటి కార్లు వున్నాయి. దాదాపు 2 గంటలపాటు శ్రమించి మంటల్ని అదుపులోకి తీసుకువచ్చారు అగ్నిమాపక సిబ్బంది. మంటలు పార్కింగ్ లాట్ వరకే పరిమితం అవడంతో పెను ప్రమాదం తప్పింది. లేదంటే, ఊహించని ప్రమాదమే జరిగేది.

భవనం కింద పార్కింగ్ లాట్ చుట్టూ టార్పాలిన్లు కట్టి వుండటంతో అందులోని వేడిమి బయటికి వెళ్లడానికి వీలులేకపోయింది. దీనికితోడు కార్లలో వుండే ఇంధనం, సీటు కుషన్స్ వంటివన్నీ సులభంగా మండే స్వభావం వుండేవే కావడం ఈ అగ్ని ప్రమాదానికి ఓ కారణమై వుండొచ్చని పోలీసులు భావిస్తున్నారు.