క్వారంటైన్‌తో ఒత్తిడికి గురై బాలుడి ఆత్మహత్య

కరోనా మహమ్మారి మనిషి జీవితంతో ఆటలాడుకుంటోంది. లాక్‌డౌన్‌తో ఆటాపాటలు లేకుండా ఇంటికే పరిమితం కావడంతో చిన్నారుల్లో విపరీత ప్రవర్తన వస్తోంది. ఇక వైరస్ బారిన పడి క్వారంటైన్‌లో ఉండాల్సి వస్తే వారి పరిస్థితి మాటల్లో చెప్పలేనివిధంగా ఉంది. 14 నుంచి 28 రోజుల పాటు క్వారంటైన్‌లో ఉండాల్సి రావడంతో పిల్లలు పిచ్చి పట్టిన వారిలా ప్రవర్తిస్తున్నారు. కొంత మంది ఏకంగా ప్రాణాలు తీసుకుంటున్నారు.

హోమ్ క్వారంటైన్‌లో ఉన్న 15 ఏళ్ల బాలుడు సీలింగ్ ఫ్యాన్‌కు ఉరేసుకుని ఆత్మహత్య చేసుకున్న ఘటన కర్ణాటకలోని ఉడుపి జిల్లాలో చోటు చేసుకుంది.

ఉడిపి జిల్లా సాలిగ్రామకు చెందిన ఓ మహిళ ఇళ్లలో ప‌ని మ‌నిషిగా పనిచేస్తూ కుటుంబాన్ని పోషిస్తోంది. అయితే.. ఆమె ప‌ని చేస్తున్న ఇంట్లో ఒక‌రికి క‌రోనా పాజిటివ్ వ‌చ్చింది. దీంతో ఆమెను హోం క్వారంటైన్‌లో ఉండాల్సిందిగా అధికారులు సూచించారు. ఆమెతో పాటు 15 ఏళ్ల ఆమె కుమారుడిని కూడా క్వారంటైన్‌లో ఉండాల్సిందిగా ఆదేశించారు. కోటాలో ఉండి పదో తరగతి చదువుతున్న ఆ బాలుడు లాక్‌డౌన్ విధించడంతో తల్లి దగ్గరకు వచ్చేశాడు.

హోమ్ క్వారంటైన్‌లో ఉన్న ఆ బాలుడిని బయటకు వెళ్లడానికి అనుమతించకపోవడంతో కొద్ది రోజులుగా తీవ్ర ఒత్తిడికి గురవుతున్నారు. మానసికంగా ఇబ్బంది పడుతున్నాడు. ఈ నేపథ్యంలోనే మంగళవారం ఇంట్లో సీలింగ్ ఫ్యాన్‌కు ఉరేసుకుని ఆత్మహత్య చేసుకున్నాడు.

ఘ‌ట‌న‌పై కేసు నమోదు చేసినట్లు పోలీసులు తెలిపారు. బాలుడి మృత‌దేహాన్ని పోస్టుమార్టం నిమిత్తం ఆస్పత్రికి త‌ర‌లించారు. అతడి నమూనాలను సేకరించి కరోనా పరీక్షలకు పంపించారు. ఫలితాలు వచ్చిన తర్వాత అంత్యక్రియలు నిర్వహించనున్నారు.

Also Read: ఆ మరణం.. ఇప్పటికీ ఓ చేదు జ్ఞాపకం

Don't Miss: కొవిడ్ యోధులకు వైరస్ సోకకుండా రక్షణ కవచం.. ఎయిమ్స్ ఆవిష్కరణ