రెండు రకాల రూ.500 నోట్ల ముద్రణ ఓ పెద్ద స్కామ్!

ప్రభుత్వం రెండు రకాల రూ.500 కొత్త నోట్లు ముద్రించిందనే ప్రతిపక్ష పార్టీల ఆరోపణలతో మంగళవారం (ఆగస్టు 8) రాజ్యసభలో తీవ్ర గందరగోళం నెలకొంది. రాజ్యసభలో కాంగ్రెస్‌ నేతలు వేర్వేరు పరిమాణాలు, డిజైన్లలో ఉన్న కొత్త రూ. 500 నోట్లను చూపిస్తూ.. ఇలా రెండు రకాలుగా ముద్రించాల్సిన అవసరం ఏమొచ్చిందని ప్రభుత్వాన్ని ప్రశ్నించారు. అవి ఒకటి పార్టీ కోసం, మరొకటి ప్రభుత్వం కోసమే ముద్రించారని వారు ఆరోపించారు. ‘మేం అధికారంలో ఉన్నప్పుడు ఎప్పుడూ ఇలా రెండు రకాల నోట్లు ముద్రించలేదు. కుట్రపూరితంగానే రూ.500, రూ. 2000 నోట్లను రెండు రకాల్లో ముద్రించారు. ఈ శతాబ్దంలోనే ఇది అతిపెద్ద కుంభకోణం’ అని కాంగ్రెస్‌ నేత గులాం నబీ ఆజాద్‌ ఆరోపించారు.

కాంగ్రెస్‌ సీనియర్‌ నేత కపిల్‌ సిబాల్‌ మాట్లాడుతూ.. ‘ప్రభుత్వం నోట్ల రద్దు నిర్ణయాన్ని ఎందుకు తీసుకుందో ఇప్పుడు అర్థమైంది. రిజర్వు బ్యాంక్ ఆఫ్‌ ఇండియా రెండు రకాల పరిమాణాలు, డిజైన్లలో కొత్త నోట్లను ముద్రించింది’ అని పేర్కొన్నారు. కాంగ్రెస్‌ వాదనకు తృణమూల్‌ కాంగ్రెస్‌ నేతలు కూడా మద్దతు పలకడంతో తీవ్ర గందరగోళం నెలకొంది.

కొత్త నోట్లపై కాంగ్రెస్‌ ఆరోపణలకు కేంద్ర ఆర్థిక శాఖ మంత్రి అరుణ్‌ జైట్లీ ఘాటుగా బదులిచ్చారు. ‘అనవసరమైన వ్యాఖ్యలు చేస్తూ సభ సమయాన్ని వృథా చేస్తున్నారు. జీరో అవర్‌లో ఎన్నో ముఖ్యమైన అంశాలపై చర్చించాల్సి ఉంది. సమయాన్నంతా నాశనం చేస్తున్నారు’ అని ఆయన మండిపడ్డారు. జైట్లీ వ్యాఖ్యలతో కాంగ్రెస్‌ సభ్యులు సభ మధ్యలోకి వెళ్లి ప్రభుత్వానికి వ్యతిరేకంగా నినాదాలు చేశారు.

మరోవైపు.. వేర్వేరు ప్రాంతాల్లోని ముద్రణా కార్యాలయాల్లో నోట్లను ముద్రించడం వల్ల వాటి పరిమాణం, డిజైన్లలో స్వల్ప మార్పులు ఉండవచ్చు గానీ, ప్రభుత్వం 2 రకాల నోట్లను ముద్రించమని ఆదేశాలు ఇవ్వలేదని ఆర్థిక మంత్రిత్వ శాఖ వర్గాలు వెల్లడించాయి.