లోయలో పడ్డ రెండు బస్సులు.. 9 మంది మృతి, 46 మందికి గాయాలు

హిమాచల్ ప్రదేశ్‌లో విషాదం చోటు చేసుకుంది. ప్రయాణికులతో వెళ్తున్న ఓ ప్రైవేటు బస్సు ఘాట్ రోడ్డులో అదుపు తప్పి లోయలో పడిపోయింది. దాదుహు ప్రాంతంలో చోటుచేసుకున్న ఈ ప్రమాదంలో 9 మంది మృతిచెందగా, 25 మంది తీవ్రంగా గాయపడ్డారు. 40 మంది ప్రయాణికులతో రేణుకాజీ నుంచి నాహాన్‌కు వెళ్తుండగా ఈ ప్రమాదం చోటుచేసుకుంది.

ప్రమాద వార్త తెలియగానే పోలీసులు హుటాహుటిన సంఘటనా స్థలికి చేరుకుని క్షతగాత్రులను నహాన్ మెడికల్ కాలేజ్‌కు తరలించారని ఏఎస్పీ విరేంద్ర సింగ్ తెలిపారని ‘పీటీఐ’ వార్తా సంస్థ వెల్లడించింది. అతి వేగం వల్లే బస్సు ప్రమాదానికి గురైందని ప్రాథమిక విచారణలో తెలిసింది.

మరో ఘటనలో 21 మంది గాయాలు: హిమాచల్ ప్రదేశ్‌లో మరో టూరిస్టు బస్సు కూడా ప్రమాదానికి గురైంది. ఢిల్లీ నుంచి షిమ్లా వెళ్తున్న బస్సు కైరీ నల్లా‌కు చేరగానే అదుపుతప్పి లోయలో పడిపోయింది. ఈ ప్రమాదంలో 21 మంది గాయపడ్డారు. స్థానికులు వెంటనే ఘటనా స్థలికి చేరి పోలీసుల సాయంతో క్షతగాత్రులను ఆసుపత్రికి తరలించారు.