బెంగాల్‌లో 250 కుక్కల మృతి.. ఇదేం వైరస్!

పశ్చిమ బెంగాల్‌లో వీధి కుక్కల మృతి అలజడి రేపుతోంది. ఆ రాష్ట్రంలోని బంకురా జిల్లా విష్ణుపూర్ (Bishnupur)‌ పట్టణంలో మూడు రోజుల వ్యవధిలో 250 వీధి కుక్కలు మరణించాయి. స్థానిక అధికారులు చెప్పిన లెక్కల ప్రకారం.. మంగళవారం (ఫిబ్రవరి 16) 62, బుధవారం 96 శునకాలు మరణించాయి. శుక్రవారం రాత్రి వరకు మరో 100కు పైగా శునకాలు మృతి చెందాయి. వీటిలో కొన్ని పెంపుడు కుక్కలు కూడా ఉన్నాయి.

శునకాలు పెద్ద సంఖ్యలో మృత్యువాతపడుతుండటంతో స్థానికులు ఆందోళన చెందుతున్నారు. కుక్కల మృతికి వైరల్‌ ఇన్‌ఫెక్షనే కారణమై ఉంటుందని వైద్య సిబ్బంది అనుమానిస్తున్నారు. మృతి చెందిన శునకాల నుంచి నమూనాలు సేకరించి పరీక్షల నిమిత్తం కోల్‌కతాకు పంపించారు.

పర్వో వైరస్ (Parvovirus) కారణంగానే ఆ మూగజీవాలు అకస్మాత్తుగా మరణిస్తుండవచ్చునని వైద్య నిపుణులు చెబుతున్నారు. కుక్కల్లో వ్యాప్తి చెందే ఈ వైరస్ చాలా ప్రమాదకరమైనదని వారంటున్నారు. కుక్కల్లో ఈ వైరస్ ఒక దాని నుంచి మరొకదానికి తేలిగ్గా వ్యాపిస్తుందని తెలిపారు. ప్రస్తుతానికి ఈ సమస్య విష్ణుపూర్‌కు మాత్రమే పరిమితమై ఉందని అధికారులు వెల్లడించారు.