ఆక్సిజన్ అందక 30 మంది చిన్నారుల దుర్మరణం!

ఉత్తరప్రదేశ్‌లో అత్యంత దయనీయమైన విషాదం చోటు చేసుకుంది. ఓ ఆసుపత్రిలో ఆక్సిజన్ అందక 30 మంది చిన్నారులు మృతి చెందారు. గోరఖ్‌పూర్‌లోని బీఆర్డీ (బాబా రాఘవ్ ‌దాస్ మెడికల్ కాలేజ్) ఆస్పత్రిలో ఈ ఘటన జరిగింది. చిన్నారులందరూ మెదడు సంబంధిత వ్యాధి (ఎన్‌సెఫలైటిస్)తో బాధపడుతున్నారు. హాస్పిటల్‌లో ఆక్సిజన్ కావాల్సిన స్థాయిలో అందుబాటులో లేదని, ఈ విషయాన్ని పైఅధికారులకు చెప్పినప్పటికీ.. ఎలాంటి చర్యలు తీసుకోలేదని ఆసుపత్రి వర్గాలు పేర్కొన్నాయి. ఆక్సిజన్ అందుబాటులో లేని కారణంగా.. గత 48 గంటల్లో ఆసుపత్రిలో చికిత్స పొందుతున్న 30 మంది చిన్నారులు ప్రాణాలు కోల్పోయారని కలెక్టర్ తెలిపారు.

ఈ ఘటనపై ప్రభుత్వం నుంచి ఎలాంటి స్పందన రాలేదు. గోరఖ్‌పూర్.. ఉత్తరప్రదేశ్ ముఖ్యమంత్రి యోగి ఆదిత్యనాథ్ సొంత నియోజకవర్గం కావడం గమనార్హం. ఆయన ఆ నియోజకవర్గం నుంచి వరసగా 5 సార్లు పార్లమెంట్‌కు ఎన్నికయ్యారు. సీఎం పదవి చేపట్టిన నేపథ్యంలో ఆగస్టు 5న ఆయన ఎంపీ పదవికి రాజీనామా చేశారు.