దేశంలోనే తొలిసారిగా 'పుర్రె మార్పిడి' చికిత్స విజయవంతం

దేశ వైద్యరంగ చరిత్రలోనే అద్భుతం జరిగింది. దేశంలో తొలిసారిగా పుణెలో పుర్రె మార్పిడి శస్త్రచికిత్సను విజయవంతమయ్యింది. రోడ్డు ప్రమాదంలో గాయపడిన నాలుగేళ్ల చిన్నారి పుర్రెకు తీవ్ర గాయమయ్యింది. 60శాతం గాయమైన పుర్రెను.. డైమెన్షనల్ ఇండిసిమేటెడ్ పాలిథిలిన్ ఎముకల ద్వారా మార్చేశారు. నాలుగు నెలల పాటూ చిన్నారిని అబ్జర్వేషన్‌లో ఉంచిన డాక్టర్లు.. తమ సర్జరీ విజయవంతమయ్యిందని తెలిపారు. బాలిక హాయిగా స్కూలుకు వెళుతూ.. తన స్నేహితులతో ఆడుకోవడం ఆనందంగా ఉందంటున్నారు.

పుణెకు చెందిన నాలుగేళ్ల బాలిక గతేడాది మేలో జరిగిన రోడ్డు ప్రమాదంలో తీవ్రంగా గాయపడింది. ఆమె తలకు బలమైన గాయం కావడంతో ఆస్పత్రికి తరలించి వెంటిలేటర్‌పై చికిత్స అందించారు. చిన్నారి పుర్రెకు తీవ్రమైన గాయం అయినట్లు గుర్తించిన డాక్టర్లు.. రెండు కీలకమైన సర్జరీలు చేశారు. అలాగే ఆమె పుర్రెలో 60శాతం ఎముకలు డ్యామేజ్ అయినట్లు తేల్చారు. అయితే ఆమె వయసు రీత్యా ఆ ఎముకల్ని మార్చడం అంత మంచిది కాదని భావించిన డాక్టర్లు ఓ ఏడాది తర్వాత సర్జరీ చేయాలని నిర్ణయించారు. అప్పటి వరకు ఆమెను మెడికల్ అబ్జర్వేషన్‌లో ఉంచారు.

ఈ ఏడాది మే నెలలో బాలిక తిరిగి ఆస్పత్రిలో చేరింది. మే 18న డాక్టర్లు పుర్రె మార్పిడి చికిత్సను నిర్వహించారు. అమెరికాకు చెందిన ఓ సంస్థ తయారు చేసిన డైమెన్షనల్ ఇండిసిమేటెడ్ పాలిథిలిన్ ఎముకల్ని బాలిక పుర్రెకు అమర్చారు. రెండు నెలల తర్వాత ఆమెను ఆస్పత్రి నుంచి డిశ్చార్జ్ చేశారు. తర్వాత బాలిక కోలుకుంది.. స్కూల్‌కు వెళుతూ.. తన స్నేహితులతో సంతోషంగా ఆడుకుంటోందని తల్లి తెలిపింది.

ఈ సర్జరీ విజయవంతం కావడంపై పుణె ఆస్పత్రి డాక్టర్లు హర్షం వ్యక్తం చేశారు. దేశంలోని తొలిసారిగా పుర్రెమార్పిడి చికిత్స విజయవంతం కావడంతో ఆనందంగా ఉందంటున్నారు. రాబోయే రోజుల్లో ఈ సర్జరీ మరింత సులభతరం అవుతుందని ధీమా వ్యక్తం చేస్తున్నారు.
Read This Story In English