‘మోదీజీ అభివృద్ధి ఎక్కడ.. ఓ కొడుకు కోసం ఐదుగురు కూతుళ్లను కన్నట్టుంది’

కేంద్ర ప్రభుత్వం చేపట్టిన అభివృద్ధి సంక్షేమ పథకాలు, నోట్ల రద్దు, జీఎస్టీ తదితర అంశాలపై మధ్యప్రదేశ్‌కు చెందిన కాంగ్రెస్ పార్టీ ఎమ్మెల్యే చేసిన వ్యాఖ్యలతో పెను దుమారం రేగుతోంది. ‘ప్రజలు కొడుకు పుడతాడనే ఆశతో ఐదుగురు కుమార్తెలు పుట్టేవరకూ ఎదురుచూశారు.. ఈ కుమార్తెలందరూ పుట్టారు కానీ, అభివృద్ధి అనే అనే కుమారుడు ఇంకా పుట్టలేదు అంటూ’ మధ్యప్రదేశ్ విద్యా శాఖ మాజీ మంత్రి, కాంగ్రెస్ ఎమ్మెల్యే జీతూ పట్వారీ చేసిన ట్వీట్ రాజకీయ దుమారానికి కారణమయ్యింది. మధ్యప్రదేశ్ కాంగ్రెస్ వర్కింగ్ ప్రెసిడెంట్‌గానూ జీతూ పట్వారీ కొనసాగుతున్నారు.

కాగా, 2014, 2019 సార్వత్రిక ఎన్నికల్లో ప్రధాని నరేంద్ర మోదీ ‘సబ్‌కా సాత్, సబ్‌కా వికాస్’నినాదాన్ని జీతూ ప్రస్తావిస్తూ కేంద్రంపై విమర్శలు గుప్పించారు. అయితే, ట్విట్టర్‌లో తాను చేసిన వ్యాఖ్యలపై దుమారం రేగడంతో జీతూ పట్వారీ క్షమాపణలు చెప్పారు. ‘ఎవరి మనోభావాలను కించపరచడం తన ఉద్దేశం కాదని, మనోభావాలు దెబ్బతింటే క్షమాపణ కోరుతున్నాను.. ఆడపిల్లలు దేవతలు’అంటూ సంజాయిషీ ఇచ్చారు.

నోట్లరద్దు, జీఎస్టీ, ద్రవ్యోల్బణం, నిరుద్యోగం, మాంద్యంతో దేశ ఆర్ధిక వ్యవస్థను మోదీ విచ్ఛిన్నం చేశారు. అభివృద్ధిపై ఆశతో మాత్రమే ప్రజలు ఇవన్నీ భరించారు. తన వ్యాఖ్యలతో ఎవరి మనోభావాలు దెబ్బతిన్నట్లయితే నేను చింతిస్తున్నాను’ అని పేర్కొన్నారు. ఎన్నికల్లో ప్రజలకు ఇచ్చిన హామీలను నెరవేర్చడంలో బీజేపీ విఫలమైందనే ఉద్దేశంతోనే ఈ వ్యాఖ్యలు చేసినట్టు వివరించారు.

పట్వారీ వ్యాఖ్యలపై మధ్యప్రదేశ్ ముఖ్యమంత్రి శివరాజ్‌సింగ్ చౌహన్ తీవ్రంగా మండిపడ్డారు. ఈ వ్యాఖ్యలను కాంగ్రెస్ అధినేత్రి సోనియా గాంధీ ఖండించాలని డిమాండ్ చేశారు. జాతీయ మహిళ కమిషన్ కూడా ఈ వ్యాఖ్యలపై స్పందించింది. జీతూ పట్వారీ నుంచి వివరణ కోరతామని జాతీయ మహిళా కమిషన్ ఛైర్మన్ రేఖా శర్మ అన్నారు.