హల్వా తిని ఐదుగురు దుర్మరణం..

హల్వా తిని అయిదుగురు దుర్మరణం పాలైన ఘటన రాజస్థాన్‌లోని భుటేలాలో చోటు చేసుకుంది. మరో ముగ్గురి పరిస్థితి విషమంగా ఉంది. పోలీసులు తెలిపిన వివరాల ప్రకారం.. భిల్వారా జిల్లా భుటేలాకు చెందిన ఓ ఇంటికి అతిథులు వచ్చారు. గెస్టుల కోసం ఆ కుటుంబీకులు ప్రత్యేకంగా హల్వా చేసి వడ్డించారు. అయితే హల్వా తిన్న తర్వాత వారందరూ అస్వస్థతకు గురయ్యారు. వారిని వెంటనే సమీపంలోని ఆసుపత్రికి తరలించగా.. అప్పటికే కొంత మంది మరణించారు. పరిస్థితి విషమించిన మరికొంత మందిని భిల్వారా జిల్లా ఆసుపత్రికి తరలించారు.

ఫుడ్ పాయిజన్ కారణంగానే ఈ విషాదం చోటు చేసుకున్నట్లు వైద్యులు చెబుతున్నారు. కావాలనే ఎవరైనా విష ప్రయోగం చేశారా అనే కోణంలోనూ పోలీసులు కేసు విచారిస్తున్నారు. ఘటనలో మొత్తం అయిదుగురు వ్యక్తులు మరణించారు. మృతుల్లో అయిదేళ్ల చిన్నారి కూడా ఉంది. మరో ముగ్గురి పరిస్థితి ఆందోళనకరంగా ఉంది.