నోట్ల రద్దుకు ముందే కొత్త నోట్లకు ఆమోదం!

కేంద్ర ప్రభుత్వం నోట్ల రద్దు (డీమానిటైజేషన్)కు ముందే కొత్త నోట్ల డిజైన్‌ను ఆమోదించినట్లు సమాచార హక్కు చట్టం ద్వారా బయటికొచ్చింది. పాత నోట్ల రద్దుతో వినియోగంలోకి వచ్చిన కొత్త రూ. 2000, రూ. 500 నోట్లను ఐదు నెలల ముందే అంటే జూన్ 7వ తేదీనే ప్రభుత్వం ఆమోదించినట్లు రిజర్వ్ బ్యాంక్ ఆఫ్ ఇండియా బహిర్గతం చేసింది. సమాచార హక్కు చట్టం ద్వారా ఎన్డీటీవీ వేసిన పిటిషన్కు సమాధానంగా ఆర్బీఐ ఈ విషయాన్ని వెల్లడించింది. రూ. 1000, రూ. 500 నోట్లను రద్దు చేస్తున్నట్లు గతేడాది నవంబర్ 8వ తేదీ రాత్రి ప్రధాన మంత్రి నరేంద్ర మోదీ ప్రకటించిన విషయం తెలిసిందే.

నరేంద్ర మోదీ తీసుకున్న ఈ సంచలన నిర్ణయం వల్ల దేశంలో ఆర్థికపరంగా చాలా మార్పులు వచ్చాయి. ఓ వైపు నగదు కొరతతో ప్రజలు ఇబ్బందులు పడినా ప్రభుత్వానికి అండగా నిలిచారు. మరోవైపు తమ వద్ద ఉన్న పాతనోట్లను ఎలాగైనా మార్చేందుకు ప్రయత్నించిన బడాబాబులు, బ్యాంక్ అధికారులు పోలీసులకు చిక్కారు. నిజానికి కొత్త నోట్ల డిజైన్‌కు గ‌త ఏడాది మే 19న ఆమోదం తెలిపినట్టు ఆర్బీఐ వెల్లడించింది. తరవాత వాటిని కేంద్రం ఆమోదించింది. కాగా, కొత్త రూ. 2000, రూ. 500 నోట్లను ముద్రించడానికి ఎంత సమయం ప‌డుతుంద‌ని ఆర్టీఐ ప్రకారం అడిగిన ప్రశ్నకు ఆర్బీఐ సమాధానం ఇచ్చేందుకు నిరాకరించింది.