అవగాహన కల్పించబోతే.. తుపాకీ గురిపెట్టి ఐదుగురు మహిళల గ్యాంగ్ రేప్

జార్ఖండ్‌‌లో దారుణం చోటు చేసుకుంది. ఐదుగురు మహిళలను ఎత్తుకెళ్లిన యువకులు.. తుపాకీ గురిపెట్టి వారిని గ్యాంగ్ రేప్ చేశారు. లాభాపేక్ష లేని సంస్థకు చెందిన ఈ ఐదుగురు యవతులు మానవ అక్రమ రవాణా గురించి అవగాహన కల్పిస్తుండగా.. వారిని ఎత్తుకెళ్లి ఈ దారుణానికి పాల్పడటం గమనార్హం. మంగళవారం సాయంత్రం అర్కీలో ఈ ఘటన చోటు చేసుకుంది.

మానవ అక్రమ రవాణా గురించి 11 మంది మహిళల బృందం ప్రదర్శన ద్వారా స్థానికులకు అవగాహన కల్పిస్తుండగా.. యువకుల గ్యాంగ్ అక్కడికి చేరుకుంది. ఆయుధాలతో బెదిరించి ప్రదర్శనను మధ్యలో ఆపేశారు. అడ్డొచ్చిన వారిని చితకబాది తుపాకీని తలకు గురిపెట్టి మహిళలను అక్కడి నుంచి తీసుకెళ్లారు. తర్వాత వారిని గ్యాంగ్ రేప్ చేశారు.

ఈ ఘటనతో ప్రమేయం ఉందని అనుమానిస్తోన్న 9 మందిని పోలీసులు అదుపులోకి తీసుకొని ప్రశ్నిస్తున్నారు. మహిళలకు వైద్య పరీక్షలు నిర్వహించగా.. వారు అత్యాచారానికి గురయ్యారని తేలింది.