బ్యాంక్ దోపిడీ.. క్యాషియర్‌ను కాల్చి చంపిన దుండగులు

దేశ రాజధాని నేరగాళ్లకు అడ్డాగా మారుతోంది. ఇటీవల ఓ వ్యక్తిని నడిరోడ్డుపై కాల్చి చంపిన ఘటన మరవకు ముందే.. శుక్రవారం పట్టపగలు గుర్తుతెలియని దుండగులు బ్యాంకులోకి చొరబడి దోపిడీకి పాల్పడ్డారు. వారికి ఎదురుతిరిగిన క్యాషియర్‌పై విచక్షణరహితంగా కాల్పలు జరిపారు. అనంతరం రూ.3 లక్షల నగదు ఎత్తుకెళ్లారు.

ఈ ఘటన ఢిల్లీలోని చావ్లా సమీపంలోని కైరా గ్రామ కార్పోరేషన్‌ బ్యాంకులో శుక్రవారం చోటుచేసుకుంది. ఆరుగురు దుండగులు ముఖాలకు ముసుగులు ధరించి వచ్చిన దుండగలు ముందుగా సెక్యూరిటీ గార్డుపై దాడిచేసి, అతడి నుంచి గన్‌లాక్కున్నారు. వారిని అడ్డుకోడానికి ప్రయత్నించిన ఓ వృద్ధ కస్టమర్‌ను సైతం కొట్టారు. అనంతరం క్యాషియర్ సంతోష్ కుమార్(45)ను డబ్బు మొత్తం ఇవ్వాలని బెదిరించారు. సంతోష్ ఎదురు తిరగడంతో కాల్చి చంపారు. బుల్లెట్‌ చాతి నుంచి దూసుకెళ్లడంతో సంతోష్ అక్కడికక్కడే మరణించాడు. పోలీసులు కేసు నమోదు చేసుకుని దర్యాప్తు చేస్తున్నారు.