ఏడేళ్ల పాప లెటర్‌కు బదులిచ్చిన పిచాయ్!

ఆ పాప వయసు ఏడేళ్లే. పెద్దయ్యాక గూగుల్‌లోనే పనిచేయాలనుకుంది. అందరిలా.. అనుకొని అలాగే వదిలేయకుండా.. ఆ కంపెనీ బాస్‌కు లెటర్ రాసింది. అంత చిన్న వయసులో ఇంత గొప్ప ఆలోచన రావడమే విశేషం అనుకుంటే.. గూగుల్‌ సీఈఓ సుందర్‌ పిచాయ్‌ కూడా ఆ లేఖకు బదులివ్వడం మరో విశేషం.

బ్రిటన్లోని ఓ పట్టణానికి చెందిన ఏడేళ్ల పాపకు తన వద్ద ఉన్న టాబ్లెట్ అంటే చాలా ఇష్టం. రోబోలన్నా ఇష్టమే. కంప్యూటర్ నాలెడ్జ్ కూడా ఉంది. తన నైపుణ్యాలు తదితర అంశాలను ప్రస్తావిస్తూ సుందర్ పిచాయ్‌కు లెటర్ రాసింది. ఆ లేఖలో ‘డియర్‌ గూగుల్‌ బాస్‌’ అంటూ సంబోధించింది.

దీనికి సుందర్ పిచాయ్ స్పందిస్తూ.. ‘కంప్యూటర్లంటే నీకున్న ఇష్టం చూస్తే.. ముచ్చటేస్తోంది. నైపుణ్యాలను ఇంకా పెంచుకుంటావని భావిస్తున్నా. గట్టి పట్టుదలతో కృషి చేస్తేనే మన కలలు నిజమవుతాయి. అప్పుడే నువ్ కోరుకున్నవన్నీ దక్కుతాయి. నీ చదువు పూర్తయ్యాక ఉద్యోగం కోసం గూగుల్‌కు నువ్ పంపే దరఖాస్తు కోసం ఎదురుచూస్తూ ఉంటా.’ అని బదులిస్తూ తిరిగి లెటర్ రాశారు.

ఇంతకీ ఆ పాపకు గూగుల్ గురించి ఎలా తెలుసనేగా మీ అనుమానం.. పని చేయడానికి బెస్ట్ కంపెనీ ఏది అని ఆ పాప తన తండ్రిని అడిగిందట. దీంతో ఆయన గూగుల్‌ గురించి వివరించారు.