Car stunt in gurugram: తప్ప తాగి కారుతో విన్యాసాలు... యువకుల స్టంట్‌‌లతో ఒకరి మృతి

Car stunt in gurugram: యువకుల అత్యుత్సాహం వల్ల ఒకరి ప్రాణం పోయింది. మరో ఇద్దరికి తీవ్ర గాయాలయ్యాయి. ఈ ఘటన గురుగ్రామ్‌లో చోటుచేసుకుంది. అర్ధరాత్రి 2 గంటల సమయంలో 8 మంది యువకులు తమ కార్లతో స్టంట్స్ చేశారు. ఓ మద్యం షాపు దగ్గర ఈ పిచ్చి పని చేశారు. మారుతి ఎర్టిగా, హ్యుండాయ్ వెన్యూ, హ్యాండాయ్ క్రెటా అనే మూడు కార్లతో స్టంట్‌లు చేశారు. వీరి స్టంట్‌లు కొందరి ప్రాణం మీదకు తెచ్చాయి. సినిమాల్లో చూపించే విధంగా సౌరభ అనే వ్యక్తి తన కారుతో స్టంట్ చేసి హీరోయిజాన్ని ప్రదర్శించాడు.

మొదటి స్టంట్ విజయవంతంగా పూర్తి చేసినా... రెండో స్టంట్‌లో మద్యం షాపు బయట ఉన్న ముగ్గురు వ్యక్తులను ఢీకొట్టాడు. ఈ ఘటనలో ఓ వ్యక్తి (50) అక్కడికక్కడే ప్రాణాలు కోల్పోయాడు. అంతేకాదు మరో ఇద్దరు వ్యక్తులకు గాయాలయ్యాయి. దీంతో పోలీసులు రంగంలోకి దిగి... స్టంట్‌లు చేసిన సౌరభ్ శర్మ అలియాస్ సాయిబీ, రాహుల్, రవి సింగ్ అలియాస్ రవీందర్, వికాస్ అలియస్ విక్కీ, మోహిత్, ముకల్ సోనిలను అదుపులోకి తీసుకున్నారు. అశోక్ అనే మరో నిందితుడిని కూడా అరెస్ట్ చేశారు.


వారంతా మద్యం సేవించి ఈ స్టంట్‌లు చేసినట్టు పోలీసులు తెలిపారు. అయితే అక్కడే ఉన్న సీసీ ఫుటేజ్‌ను కూడా పోలీసులు పరిశీలించారు. అందులో సుమారు 10 నుంచి 12 మంది యువకులు మద్యం దుకాణం ముందు కార్లతో విన్యాసాలు చేయడం కనిపించిందని సీనియర్ పోలీస్ అధికారి తెలియజేశారు. మరోవైపు దీనికి సంబంధించిన వీడియో నెట్టింట వైరల్ అవుతుంది.