ఎన్నికల్లో తలపడనున్న 95ఏళ్ల ముసలవ్వ!

మూడు చక్రాలకే పరిమితమై 95 ఏళ్ల వృద్ధురాలు..పల్లూడిపోయి..ముఖం మీద ముడతలు స్పష్టంగా కనిపిస్తున్నాయి. ఇలాంటి ముసలామెను చూసి ఎవరైనా ఏం అనుకుంటారు? ఇంటికే పరిమితమై...శేష జీవితాన్ని గడపాలని అనుకుంటారు. చూసిన వారు కూడా అలాగే భావిస్తారు. కానీ ఈమె మాత్రం ప్రజలకు సేవ చేస్తోంది. ప్రజాప్రతిధినిధి (పంచాయతీ మెంబర్)గా సేవ చేస్తోంది. తనకే సాయం వద్దు తానే నలుగురికి సాయంగా ఉంటానంటూ ఉత్తర్ ప్రదేశ్ లోని ఖేరాఘర్ కు నియోజకవర్గం నుంచి అసెంబ్లీ ఎన్నికల్లో పోటీ చేసేందుకు మంగళవారం నామినేషన్ దాఖలు చేసి ఔరా అనిపించింది.

హామీలకు పరిమితమయ్యి, అవినీతితో రాజ్యమేలుతున్న పార్టీలకు పోటీగా స్వతంత్ర అభ్యర్థిగా పోటీ చేస్తున్న ఈమె పేరు జల్ దేవి. వయస్సు 95 సంవత్సాలు. 2015లో అగ్రా బ్లాక్ లోని జగ్నర్ వార్డు నుంచి పోటీ చేసి 32ఏళ్ల ప్రత్యర్థిపై 7,213 ఓట్ల భారీ మెజార్టీతో విజయం సాధించి అందర్నీ ఖంగు తినిపించారు.

అదే ఊపులో ఈసారి ఎమ్మెల్యేగా గెలిచి మరింతమంది ప్రజలకు సేవల చేస్తానని అంటున్నారు.

‘‘ప్రజలిచ్చిన ప్రోత్సాహం, ధైర్యంతో ఎన్నికల్లో పోటీ చేస్తున్నా. నియోజకవర్గ ప్రజలకు మంచి విద్యా, ఇతర సదుపాయలం కల్పించడం, అవినీతిని తరిమి కొట్టడమే నా ఎజెండా. ఎన్నికల్లో గెలిచేందుకు అభ్యర్థులు కల్లబొల్లి కబుర్లు చెప్పి ఓట్లు పొందుతారు. గెలిచాక పత్తా లేకుండా పోతారు. కానీ, నాకు ప్రజల సమస్యలు తీర్చడమే నా కర్తవ్యం’’ అని జల్ దేవి అంటున్నారు.

యూపీ అసెంబ్లీ ఎన్నికల్లో అత్యంత కురువృద్ధురాలిగా జల్ దేవీ రికార్డు సృష్టించారు.

జల్ దేవీ తనయుడు రామ్ నాథ్ సింగ్ సికర్వార్ ఆర్మీలో టెక్నీషియన్ గా పనిచేశాడు. ఆయన స్థాపించిన లక్ష్మణ్ సేన’ తల్లి జల్ దేవీకి అండగా నిలిచింది. మీదపడ్డ వయసు, ఆరోగ్య సమస్యలను లెక్క చేయకుండా ఎన్నికల్లో పోటీ చేస్తున్న తన తల్లి విజయం కోసం తాము ప్రజల్లోకి వెళ్తున్నట్లు సింగ్ చెబుతున్నాడు.