వైకల్యంతో పుట్టిందని తల్లిదండ్రులు వదిలేస్తే.. డాక్టర్లు కొత్త జీవితం ఇచ్చారు

వైకల్యంతో జన్మించిందని పుట్టిన ఆడ శిశువును తల్లిదండ్రులు వదిలిపెట్టి వెళ్లిపోగా ఆ చిన్నారిని ఓ రైతు గమనించాడు. కడుపులో నుంచి పేగులు బయటపడి తీవ్రవేదనతో ఉన్న శిశువును చేరదీసి.. దగ్గర్లోని కమ్యూనిటీ హెల్త్ సెంటర్‌కు తీసుకెళ్లగా పరిశీలించిన అక్కడ వైద్యులు హుటాహుటిన పెద్దాసుపత్రికి తరలించారు. అక్కడ నిపుణులు ఆ శిశువుకు ఆపరేషన్ నిర్వహించి ప్రాణంపోశారు. ఈ ఘటన గుజరాత్‌లోని బనస్కాంత జిల్లాలో చోటుచేసుకుంది. వివరాల్లోకి వెళ్తే.. బనస్కాంత జిల్లా కువనా గ్రామానికి చెందిన ఓ రైతుకు జనవరి 9న గ్రామ పొలిమేరల్లో నవజాత శిశువు కంటపడింది.

పేగులు బయటపడి ప్రాణపాయస్థితిలో కొట్టుమిట్టాడుతున్న ఆ చిన్నారిని స్థానిక హెల్త్ సెంటర్‌కు తీసుకెళ్లాడు. పరీక్షించిన వైద్యులు ఆ చిన్నారిని అహ్మదాబాద్ జనరల్ హాస్పిటల్‌కు తరలించారు. చిన్న పిల్లల వైద్య నిపుణుడు డాక్టర్ రాకేశ్ జోషి నేతృత్వంలోని వైద్యుల బృందం ఆ శిశువును పరీక్షించి తక్షణమే సర్జరీ చేయాలని నిర్ణయించారు. ఎన్ఐసీయూలో చేర్పించి అదే రోజు ఆపరేషన్ చేశారు. ఆపరేషన్ విజయవంతం కావడంతో శిశువుకు ప్రాణాపాయం తప్పింది. హాస్పిటల్‌లో చేరే రోజుకు 2.3 కిలోల బరువున్న శిశువు ప్రస్తుతం 2.8 కిలోలకు చేరుకున్నట్టు డాక్టర్లు తెలిపారు. హాస్పిటల్ నుంచి డిశ్చార్జ్ అనంతరం శిశు విహార్‌కు తరలించారు.

శిశువుకు పొత్తికడపు గోడలు పూర్తిస్థాయిలో ఏర్పడకపోవడం వల్లే పేగులు బయటకు వచ్చేశాయి.. దీనిని వైద్య పరిభాషలో గ్యాస్ట్రోశ్చిస్ అంటారని వైద్యులు వివరించారు. ప్రతి 1000 జననాల్లో నలుగురు శిశువులకు ఇలా జరుగుతుందని అహ్మదాబాద్ సివిల్ హాస్పిటల్ సూపరింటిండెండ్ డాక్టర్ జీహెచ్ రాథోడ్ తెలిపారు. ఇలాంటి వాటికి అవసరమైతే తక్షణమే ఆపరేషన్ నిర్వహించి, సరిచేయాలని పేర్కొన్నారు. అయితే, ఇలాంటి శిశువులు ప్రాణాలతో ఉండటం చాలా తక్కువని, గత పదేళ్లలో తమ హాస్పిటల్‌లో కేవలం ముగ్గురు మాత్రమే ప్రాణపాయం నుంచి బయటపడ్డారని అన్నారు.