బాబ్రీ కేసులో బీజేపీ అగ్రనేతలకు ఊరట

బాబ్రీ మసీదు కూల్చివేత కేసులో ఆరోపణలు ఎదుర్కొంటున్న బీజేపీ అగ్రనేతలు ఎల్.కె. అద్వానీ, మురళీ మనోహర్‌ జోషి, ఉమాభారతిలకు సీబీఐ ప్రత్యేక కోర్టు ఊరట కలిగించింది. ఈ కేసు విచారణ సందర్భంగా వ్యక్తిగత హాజరు నుంచి నేతలకు మినహాయింపునిచ్చింది.

సీబీఐ ప్రత్యేక కోర్టు వీరికి గత నెల 30న బెయిల్‌ మంజూరు చేసింది. కేసు నమోదు చేయొద్దంటూ దాఖలైన డిశ్చార్జ్‌ పిటిషన్‌ను తిరస్కరించింది. అద్వానీ సహా మురళీ మనోహర్ జోషీ, ఉమా భారతిలపై కేసు నమోదు చేయాలని స్పష్టం చేసింది.

1992 డిసెంబర్ 6న అయోధ్యలో ఉన్న బాబ్రీ మసీదును కరసేవకులు కూల్చివేశారు. మసీదు ప్రాంతంలో రామమందిర ఉందని.. ఒక వర్గం.. కాదు కాదు.. ఇక్కడ మసీదే ఉందని మరో వర్గం వాదించుకుంటున్నాయి. ఈ అంశంపై సుప్రీంకోర్టులో కేసు కొనసాగుతోంది.