భర్త తన లవర్‌ను పెళ్లి చేసుకోవడానికి హెల్ప్ చేసిన భార్య.. భోపాల్‌లో ఆసక్తికర ఘటన

భర్త కోసం ఓ మహిళ తన వైవాహిక జీవితాన్నే త్యాగం చేసింది. పెళ్లైన మూడేళ్ల తర్వాత తన భర్త మనసు తెలుసుకొని అతడు ప్రేమిస్తున్న యువతితో పెళ్లి జరిపించింది. మధ్య ప్రదేశ్‌లోని భోపాల్‌లో చోటు చేసుకున్న ఈ ఘటన సోషల్ మీడియాలో హాట్ టాపిక్‌గా మారింది. చాలా మంది యువకుల్లానే మధ్య ప్రదేశ్ రాజధాని భోపాల్‌కు చెందిన ఓ వ్యక్తి ఓ అమ్మాయిని ప్రాణంగా ప్రేమించాడు. కానీ, అనివార్య కారణాల వల్ల ఆమెను పెళ్లి చేసుకోలేకపోయాడు. పెద్దలు సూచించిన అమ్మాయి మెడలో తాళి కట్టాడు.

పెళ్లై మూడేళ్లు గడుస్తున్నా.. తాను ప్రేమించిన పిల్లను ఆ వ్యక్తి మరచిపోలేకపోతున్నాడు. భర్త మనసు తెలుసుకున్న అతడి భార్య కీలక నిర్ణయం తీసుకుంది. భర్తకు విడాకులిచ్చి ప్రేమించిన అమ్మాయితో అతడు కలిసి జీవించడానికి మార్గం సుగమం చేసింది. ఆ దంపతులు విడాకులు తీసుకోవడానికి సహాయం చేసిన మహిళా న్యాయవాది.. న్యూస్ ఏజెన్సీ ఏఎన్‌ఐ ప్రతినిధితో మాట్లాడుతూ ఈ వివరాలు తెలిపింది.

ముగ్గురం కలిసే ఉందాం..!
‘నువ్ అంగీకరిస్తే.. ముగ్గురం కలిసి ఉందాం.. ఆమెను కూడా ఇక్కడికి తీసుకొస్తా’ అని ఆ భర్త ప్రతిపాదించాడట. అయితే.. ఆమె ఆ ప్రతిపాదనకు తిరస్కరించి విడాకులు తీసుకోవడానికే మొగ్గు చూపారని లాయర్ తెలిపారు. ‘భార్యతో పాటు ప్రేమించిన అమ్మాయితో వివాహబంధం కొనసాగించడానికి ఆ వ్యక్తి ప్రయత్నించాడు. కానీ, అతడి భార్య మెచ్యూరిటీ కలిగిన మహిళ. చట్టప్రకారం అలా కలిసి జీవించడం కుదరదని చెప్పి అతడికి విడాకులు ఇచ్చారు. ప్రియురాలితో అతడి పెళ్లి జరగడానికి అలా తోడ్పడ్డారు’ అని లాయర్ వివరించారు.


సినిమా స్టోరీని తలపిస్తున్న ఈ ఘటనపై నెటిజన్లు ఆసక్తికర కామెంట్లు పెడుతున్నారు. తన భర్తకు ప్రియురాలితో పెళ్లి జరిపించిన ఆ మహిళపై ప్రశంసలు కురిపిస్తున్నారు. ‘ఆ భార్య కచ్చితంగా మెచ్యూరిటీ ఉన్న మహిళే.. కానీ, అతడి భర్తే, ఓ కామాంధుడు’ అంటూ ఓ నెటిజన్ కామెంట్ పెట్టాడు.

మధ్య ప్రదేశ్‌లో ఈ తరహా ఘటన ఇదే తొలిసారేం కాదు. 2019లో ఓ మహిళ.. వివాహమైన ఏడేళ్లకు తన భర్తకు విడాకులిచ్చి, అతడి లవర్‌తో పెళ్లి జరిపించింది. ఈ ఘటన కూడా భోపాల్ నగరంలోనే జరిగింది.

Must Read: బిహార్ ఎగ్జిట్ పోల్స్.. బీజేపీ, నితీశ్ కూటమికి ఈసారి పరాజయమే!

Also Read: పెళ్లైన నెలకే భర్తకు బట్టతల ఉందని తెలియడంతో..

Don't Miss: పెళ్లి కోసమే మత మార్పిడి కుదరదు.. హైకోర్టు సంచలనం, జంటకు షాక్!