కాలగర్భంలో కలిసిపోనున్న ఐఎన్ఎస్ విరాట్?

భారత నౌకా దళంలో 30 ఏళ్ల పాటు సేవలందించిన ఐఎన్ఎస్ విరాట్ విమాన వాహక నౌక ఇప్పడు కాలగమనంలో కలిసిపోనుంది. 1987లో ఇంగ్లాండు నుంచి కొనుగోలు చేసిన విరాట్ వచ్చే మార్చి 6 నాటికి 58 ఏళ్ల సర్వీసు పూర్తిచేసుకుంటుంది. భారత్‌కు రాకమునుపు 27 ఏళ్ల పాటు బ్రిటన్‌కు సేవలదించిన ఐఎన్ఎస్ విరాట్‌ను విడగొట్టి స్క్రాప్ కింద అమ్మడానికి నేవీ సిద్ధపడుతోంది.

ప్రస్తుతం విశాఖ తీరంలో ఉన్న ఈ యుద్ధ నౌకను తాము మ్యూజియంగా మారుస్తామని ఆంధ్రప్రదేశ్ ప్రభుత్వం గతంలో ప్రకటించింది. 13 అంతస్థుల ఐఎన్‌ఎస్ విరాట్‌ నౌకను ఎయిర్‌క్రాఫ్ట్ మ్యూజియంగా మార్చడానికి సుమారు రూ.1,000 కోట్లు ఖర్చవుతుందని, ఇందులో సగం రక్షణ మంత్రిత్వ శాఖ భరించాలని ఏపీ ప్రభుత్వం కోరినట్లు సమాచారం.

అయితే దీనికి సాంకేతిక సహాయం, సలహాలు మాత్రమే ఇస్తాము తప్ప నిధులు మాత్రం ఇవ్వలేమంటూ ఆ శాఖ తెలిపింది. ఈ ప్రతిపాదనలపై ప్రతిష్టంభన కొనసాగడంతో మార్చి 6 ఉపసహరించుకోవాలని రక్షణ మంత్రిత్వ శాఖ భావిస్తున్నట్లు సమాచారం.నౌక దళం నుంచి ఐఎన్ఎస్ విరాట్‌కు వీడ్కోలు పలకాడనికి ఇండియన్ నేవీ ఘనంగా ఏర్పాటు చేస్తోంది.

ఈ కార్యక్రమానికి నేవీ చీఫ్ అడ్మిరల్ సునీల్ లంబ, ఇతర అధికారులతోపాటు బ్రిటన్‌ నేవీకి చెందిన 20 మంది మాజీ అధికారులు కూడా హాజరవుతారు. అలాగే ఫస్ట్ సీ లార్డ్ అడ్మిరల్ సర్ ఫిలిప్ జోన్స్‌ కూడా విచ్చేయనున్నారని నేవీ అధికారి తెలియజేశారు. ఐఎన్ఎస్ విరాట్ భారత గొప్ప వారసత్వ సంపదనడంలో ఎలాంటి సందేహాం లేదు. ఇండియా ప్రాదేశిక జలాల్లో 5 లక్షల నాటికల్ మైళ్లు ప్రయాణించిన ఈ యుద్ధ నౌకను మ్యూజియంగా మార్చాలని భావించారు.

గతంలో భారత తొలి తరం విమాన వాహక నౌక ఐఎన్ఎస్ విక్రాంత్ విషయంలోనూ ఇలాగే జరిగింది. దాన్ని కూడా ముంబై తీరంలో 17 ఏళ్ల పాటు సంరక్షించిన నేవీ 2014లో పాత సామాన్లు కింద అమ్మేసింది. విరాట్ విషయంలోనై ప్రభుత్వం చొరవ తీసుకుని వారసత్వ సంపదను కాపాడుతుందని భావిద్దాం.