ఒక్క వార్నింగ్‌తో 24 గంటల్లో 27 కేసులు పరిష్కారం!

పోలీసులు తలచుకుంటే ఎటువంటి కేసునైనా నిమిషాల్లో ఛేదించగలరు. ఇక్కడ కూడా అదే జరిగింది. షాజహాన్‌పూర్ జిల్లాలో అపహరణకు గురైన 39 మహిళల్లో 27 మందిని పోలీసులు రాత్రికి రాత్రే గుర్తించి వారిని రక్షించారు. రెండేళ్లుగా పెండింగ్‌లో ఉన్న మహిళల కిడ్నాప్ కేసులపై తక్షణమే చర్యలు తీసుకోవాలని, లేకపోతే కఠిన చర్యలు తప్పవంటూ జిల్లా ఎస్సీ కేబీ సింగ్ తీవ్ర హెచ్చరించారు. ఎస్పీ వార్నింగ్‌తో షాజహాన్‌పూర్ పరిధిలోని ఎస్ఐలు అప్రమత్తమై కేసులను 72 గంటల్లోనే ఛేదించారు. మిగతా 12 మంది కోసం వేట కొనసాగిస్తున్నారు. బాధ్యతరాహిత్యంగా వ్యవహరించిన ఎనిమిది మంది ఎస్‌ఐలను 24 గంటల్లోనే బదిలీ చేయడంతో తమకు కూడా అలాగే జరగుతుందని మిగతావాళ్లు మేల్కొన్నారు.

2015, 2016లో నమోదైన ఈ కేసులు విషయంలో ఎలాంటి పురోగతి లేకపోవడంతో ఎస్పీ స్పందించారు. ముఖ్యంగా రోజా పోలీస్ స్టేషన్‌లో ఓ మైనర్ బాలిక అపహరణ కేసును ఎస్పీ తీవ్రంగా పరిగణించారు. దీనిపై విచారణ చేపట్టిన అధికారికి సింగ్ వార్నింగ్ ఇవ్వడంతో బాలికను గుర్తించి, రక్షించారు. ఇదే పోలీస్ స్టేషన్‌ పరిధిలో ఏడాది కిందట అపహరణకు గురైన మరో ఇద్దరు యువతులను కూడా పోలీసులు పొవ్యాన్ ప్రాంతంలో గుర్తించారు. అలాగే కొన్ని మాసాల కిందట కిడ్నాప్‌కు గురైన ముగ్గురు యువతలను 55 కిలోమీటర్ల దూరంలోని కలన్ ప్రాంతంలో గుర్తించినట్లు తెలిపారు.

అపహరణకు గురైన మరో బాలికను చండీగఢ్‌లోనూ, మరో ఇద్దరు బాలికలను అలహాబాద్‌లోనూ గుర్తించి రక్షించారు. పోలీసులు రక్షించిన 27 మందిలో మైనర్లే అధికంగా ఉన్నారు. పెళ్లి పేరుతో వారిని మభ్యపెట్టి అపహరించినట్లు పోలీసులు తెలియజేశారు. వైద్య పరీక్షల అనంతరం ఈ యువతల వాంగ్మూలాన్ని నమోదు చేసి వారి కుటుంబాలకు అప్పగిస్తామని ఎస్పీ సింగ్ తెలియజేశారు. మిగతా వారిని కూడా గుర్తించి వారి తల్లిదండ్రులకు అప్పగిస్తామని ఆయన హామీ ఇచ్చారు.