Agra: శ్వాస తీసుకోలేకపోయిన శిశువు.. తన నోటితో ప్రాణం పోసిన డాక్టరమ్మ

Agra: చావు బతుకుల్లో ఉన్నవారిని డాక్టర్లు కాపాడతారు. అందుకే వారిని దేవుళ్లతో పోలుస్తారు. మందులు, ఆపరేషన్‌లు చేసి ఎలాగైనా రక్షిస్తారు. కానీ ఓ డాక్టరమ్మ.. తన నోటితో ఓ శిశువు ప్రాణాలను కాపాడింది. ఈ అరుదైన సంఘటన ఉత్తరప్రదేశ్‌లోని ఆగ్రాలో చోటుచేసుకుంది. అయితే ఈ ఘటన మార్చిలోనే జరిగింది.. తాజాగా మరోసారి వెలుగులోకి వచ్చింది. ఈ ఏడాది మార్చిలో స్థానిక కమ్యూనిటీ హెల్త్ సెంటర్‌లో ఒక మహిళ ఓ పసి పాపకు జన్మనిచ్చింది. అయితే అలా పుట్టిన శిశువు శ్వాస తీసుకోలేకపోయింది. ఆక్సిజన్ అందించినా ఫలితం లేకపోయింది. శరీరంలో కదలిక కూడా లేదు.ఆస్పత్రిలో ఉన్న డాక్టర్ సులేఖా చౌదరి విషయం అర్థమైంది. వెంటనే ఆ పాపకు కార్డియో పల్మోనరీ రిససిటేషన్ (సీపీఆర్‌) చేశారు. అంటే నోటి ద్వారా ఆ పాపకు శ్వాస అందించారు. దాదాపు ఏడు నిమిషాల పాటు అలా చేశారు. దాంతో ఆ పసి పాపలో కదలిక వచ్చింది. ఉన్నపళంగా ఏడ్చింది. తన ప్రయత్నం ఫలించినందుకు ఆ డాక్టర్‌ సంతోషించింది. దీనికి సంబంధించిన వీడియోని యూపీ పోలీస్‌ అధికారి సచిన్ కౌశిక్ ట్విట్టర్‌లో షేర్ చేశారు. గత మార్చిలోనే ఈ విషయం వెలుగులోకి వచ్చింది. అయితే పోలీసు అధికారి మరోసారి ఈ వీడియో షేర్ చేయడంతో.. ఆ డాక్టరమ్మ చేసిన పని మరోసారి హాట్‌టాపిక్ అయింది.


ఆ వీడియోలో డాక్టర్ సులేఖ చౌదరి శిశువు ఊపిరి పీల్చుకోవడానికి తన వంతు ప్రయత్నం చేయడం, ఆమె వీపును తట్టడం చూడవచ్చు. శిశువు ఏడ్చిన తర్వాత డాక్టర్ ఆమె చేతుల్లో ఉన్న శిశువును ఆనందంగా ఊపుతూ కనిపించారు. ఈ వీడియోని చాలామంది వీక్షిస్తున్నారు. ఇప్పటికే 1.3 మిలియన్లకు పైగా చూశారు. దీనికి చాలా లైక్‌లు వచ్చాయి. శిశువును రక్షించడానికి తన శాయశక్తులా కృషి చేసినందుకు నెటిజన్లు డాక్టర్‌ను అభినందిస్తున్నారు. వృత్తి పట్ల ఆమె అంకిత భావాన్ని చూసి సెల్యూట్ చేస్తున్నారు.

Read Also:దెబ్బలు తగలకుండా... హెల్మెట్‌లు పెట్టుకుని బస్సులు నడుపుతున్న డ్రైవర్లు