ఈ సండే స్పెషల్.. రేడియోలో పక్షుల కిలకిలారావాలు..

ఉదయాన్నే పక్షుల కిలకిలరావాల మధ్య నిద్రలేస్తే.. ఎంత హాయిగా ఉంటుంది కదూ. కాంక్రీట్ జంగిల్ లాంటి నగర జీవితంలో ఆ భాగ్యం ఎక్కడిది అని బాధపడుతున్నారా..? ఈ ఆదివారం తెల్లవారు జామున మీరు కూడా పక్షుల కిలకిలారావాలను ఎంజాయ్ చేయొచ్చు. ఇంటర్నేషనల్ డాన్ కోరస్ డే సందర్భంగా ఆదివారం ఉదయం 4:30 గంటల నుంచి బెంగాల్లోని చాపమారి అడవుల నుంచి ఆలిండియా రేడియో రెయిన్ బో ఛానల్ పక్షుల కిలకిలరావాలను ప్రసారం చేయనుంది.

ఈ ప్రాజెక్ట్ కోసం ఆలిండియా రేడియో ఐర్లాండ్‌కు చెందిన ఆర్టీఈ రేడియో, ది యూరోపియన్ బ్రాడ్‌కాస్టింగ్ యూనియన్, బర్డ్ లైఫ్ ఇంటర్నేషనల్‌లతో చేతులు కలిపింది. చాప్రమరితోపాటు 13 యూరోపియన్ దేశాల నుంచి ఈ డాన్ కోరస్‌ను ప్రసారం చేయనున్నారు.

గత 20 ఏళ్లుగా బ్రిటన్‌కు చెందిన పక్షి ప్రేమికులు మే 6న ఇంటర్నేషనల్ డాన్ కోరస్ డే జరుపుకొంటున్నారు. ఆ రోజున 13 దేశాల్లోని ఆరు టైం జోన్లలోని 21 వివిధ ప్రాంతాల నుంచి పక్షుల కూతలను వినే అవకాశం మనకు లభిస్తుంది.

Read This story in Bengali

ప్రధాన ప్రోగ్రాంను ఐర్లాండ్ నుంచి ప్రసారం చేస్తారు. ఆలిండియా రేడియా చాప్రమరి బర్డ్ శాంక్చుయరీ నుంచి ఈ ప్రోగ్రాంను ప్రసారం చేస్తుంది. సునిత్ టాండన్, సుమిత్ సేన్, సుతప దత్తగుప్తా, కౌషిక్ సేన్ లాంటి పక్షి నిపుణులు ఈ కార్యక్రమాన్ని నిర్వహిస్తారు.