అజిత్ పవార్ ‘పవర్ ప్లాన్’.. ఫడ్నవీస్ ఆసక్తికర వ్యాఖ్యలు..

ప్రభుత్వ ఏర్పాటుకు మద్దతు ఇచ్చి.. అనూహ్యంగా యూటర్న్ తీసుకున్న అజిత్ పవార్ విషయమై మహారాష్ట్ర మాజీ సీఎం దేవేంద్ర ఫడ్నవీస్ నోరు విప్పారు. బీజేపీతో కలిసి ప్రభుత్వ ఏర్పాటుకు అజిత్ పవార్ తనను సంప్రదించారని ఫడ్నవీస్ తెలిపారు. తన ప్రణాళికల గురించి బాబాయి శరద్ పవార్‌కు తెలుసని చెప్పారన్నారు. శనివారం ఓ టీవీ ఛానల్‌తో మాట్లాడిన మాజీ సీఎం.. మూడు రోజులు మాత్రమే కొనసాగిన బీజేపీ-ఎన్సీపీ ప్రభుత్వం విషయమై మాట్లాడారు.

‘‘అజిత్ పవార్ నా దగ్గరకొచ్చారు. కాంగ్రెస్‌తో కలిసి ప్రభుత్వ ఏర్పాటు చేయాలని తాము (ఎన్సీపీ) అనుకోవడం లేదని చెప్పారు. మూడు పార్టీలు ఏర్పాటు చేసే ప్రభుత్వం స్థిరంగా ఉండదన్నారు. తన ప్రణాళికల గురించి బాబాయి శరద్ పవార్‌కు చెప్పానన్నారు. తనతో టచ్‌లో ఉన్న ఎన్సీపీ ఎమ్మెల్యేలకు కూడా అజిత్ ఇదే విషయం చెప్పారు’’ అని ఫడ్నవీస్ తెలిపారు.

అంతకు ముందు ఓ ఇంటర్వ్యూలో శరద్ పవార్ మాట్లాడుతూ.. ఫడ్నవీస్‌ను అజిత్‌ కలుస్తున్న విషయం తనకు తెలుసని.. కానీ ప్రభుత్వ ఏర్పాటు విషయమై వారు అవగాహనకు వచ్చినట్టు మాత్రం తెలీదన్నారు.

‘‘చాలా మంది ఎన్సీపీ ఎమ్మెల్యేలకు అజిత్ ప్లాన్ ఏంటో తెలుసు. అంతే కాదు వాళ్లందరూ అతడితో టచ్‌లో ఉన్నారు. వాళ్లలో చాలా మంది నేను మాట్లాడాను’’ అని ఫడ్నవీస్ వెల్లడించారు. ఎన్సీపీలో చాలా మంది ఎమ్మెల్యేల మద్దతు అజిత్‌కు ఉందన్న మాజీ సీఎం.. ఆయన్ను ఎవరైనా బలవంతం చేయగలరా? అని ప్రశ్నించారు.

బీజేపీతో కలిసి పని చేయాలని ప్రధాని మోదీ.. శరద్ పవార్‌ను కోరారు. కానీ మోదీ ఆఫర్‌ను ఎన్సీపీ అధినేత తిరస్కరించారు. ఆ మీటింగ్‌కు ముందు, ఆ సమయంలోనూ చాలా జరిగాయి.. ఆ వివరాలను సరైన సమయంలో వెల్లడిస్తానని ఫడ్నవీస్ తెలిపారు.