అఖిలేష్‌ను పెంచి, పెద్ద చేశాం: అమర్ సింగ్

సమాజ్ వాదీ (ములాయం వర్గం) నేత అమర్ సింగ్ యూపీ సీఎం అఖిలేష్ వ్యవహారంపై స్పందించారు. అఖిలేష్ నాలుగేళ్ల వయసు నుంచి తనకు తెలుసని, అతణ్ని పెంచి పెద్ద చేసింది తామేనని ఆయన అన్నారు. అఖిలేష్ బాల్యం, విద్యాబ్యాసం, వ్యక్తిగత జీవితంలో ఎదుగదలకు తామెంతో తోడ్పాడ్డామని అమర్ సింగ్ గుర్తు చేశారు.

ఎస్పీ ఫ్యామిలీలో గొడవలకు అమర్ సింగే కారణమని, అతనో శకునిలా మారి తమ కుటుంబాన్ని విడదీస్తున్నారని సీఎం అఖిలేష్ యాదవ్ విమర్శలు గుప్పించిన విషయం తెలిసిందే. ములాయం కుటుంబ గొడవలకు తాను కారణం కాదంటూ చెబుతూ వస్తున్న అమర్ సింగ్..కొన్నాళ్లు లండన్ లో ఉన్నారు. ఈ వారమే ఆయన ఢిల్లీ చేరుకొని..ఆ తర్వాత ములాయంతో భేటీ అయ్యారు.

అఖిలేష్ తనపై చేసిన వ్యాఖ్యలపై తాను మనస్థాపం చెందినట్లు అమర్ సింగ్ అన్నారు. ‘‘నేను లక్నో వచ్చింది గొడవలు పెట్టడానికి కాదు..ములాయం సింగ్ కు గౌరవం దక్కాలని, అఖిలేష్ కు విజయం దక్కాలని నా కోరిక’’ అని అమర్ సింగ్ అభిప్రాయపడ్డారు.

శివపాల్ యాదవ్ ఇంట్లో పెరిగిన అఖిలేష్ ఆయన్నే విమర్శించడం, వ్యతిరేకించడం శోచనీయమని అమర్ సింగ్ అన్నారు. ఇలా జరుగుతుందని ములాయం సింగ్ ఏనాడు ఊహించలేదు. జీవితంలో ఇలాంటివి జరుగుతాయని ఆయన పేర్కొన్నారు.