Delhi Municipal Exit Polls సామాన్యుడివైపే మొగ్గు.. 15 ఏళ్ల బీజేపీ పాలనకు బ్రేక్!

Delhi Municipal Exit Polls ఢిల్లీ మునిసిపల్‌ కార్పొరేషన్‌ (ఎంసీడీ) ఎన్నికల్లో ఆమ్ ఆద్మీ పార్టీ (ఆప్) గెలుపు తథ్యమని ఎగ్జిట్ పోల్స్ అంచనా వేశాయి. దాదాపు అన్ని సంస్థలూ సామాన్యుడికే మెజార్టీ సీట్లు దక్కుతాయని ఢంకాబజాయించాయి. ఈస్ట్, సౌత్, నార్త్ కార్పొరేషన్ల విలీనం తర్వాత మొదటిసారి ఎన్నికలు జరిగిన విషయం తెలిసిందే. ఆదివారం జరిగిన పోలింగ్‌లో 50 శాతం ఓటింగ్ నమోదైంది. 2017తో పోల్చితే ఓటింగ్ శాతం తగ్గింది. ఫలితాలను డిసెంబరు 7న వెల్లడించనున్నారు. ఢిల్లీ కార్పొరేషన్‌లో గత 15 ఏళ్లుగా బీజేపీ అధికారంలో కొనసాగుతోంది. ఈసారి కూడా అధికారం నిలబెట్టుకోవాలనుకున్న కమలనాథుల ఆశలపై ఢిల్లీ ఓటర్లు నీళ్లుచల్లారా? అంటే అవునని అంటున్నాయి.ఎగ్జిట్ పోల్స్. మున్సిపల్‌ ఎన్నికల్లో ప్రజలు ఆప్‌వైపే మొగ్గు చూపుతున్నట్లు ఎగ్జిట్‌పోల్స్‌ పేర్కొన్నాయి. ఆమ్ ఆద్మీ పార్టీ 43శాతం ఓట్లను పొందనుండగా.. బీజేపీ 35 శాతం ఓట్లను సాధించనున్నట్లు తెలిపాయి. కాంగ్రెస్‌ కేవలం 10 శాతానికే పరిమితం కానున్నట్లు ఎగ్జిట్‌ పోల్స్‌ పేర్కొన్నాయి.
ఆజ్ తక్- యాక్సిస్‌ మై ఇండియా
ఆప్‌: 149-171
బీజేపీ 69-91
కాంగ్రెస్‌ 3-7

టైమ్స్‌ నౌ-ఈటీజీ
ఆప్‌: 146-156
బీజేపీ: 84-94
కాంగ్రెస్: 6-10

న్యూస్‌ ఎక్స్‌-జన్‌కి బాత్‌:
బీజేపీ: 70-92
ఆప్‌: 159-175
కాంగ్రెస్‌: 3-7

జీ న్యూస్- బార్క్
ఆప్- 134-146
బీజేపీ 82-94
కాంగ్రెస్ 8-14

ఎన్డీటీవీ
ఆప్-155
బీజేపీ-84
కాంగ్రెస్-7

ఢిల్లీలో గెలిచి కేజ్రీవాల్‌కు చెక్ పెట్టాలనే సంకల్పంతో బీజేపీ నేతలు ముమ్మర ప్రచారం చేశారు. అనేక మురికివాడలను రెగ్యులరైజ్ చేయడంతో తమకు కలిసొస్తుందని బీజేపీ భావించింది. అలాగే, స్టార్ క్యాంపెయినర్లతో ప్రచారం సాగించింది. అటు, బీజేపీకి ధీటుగా ఆమ్ ఆద్మీ పార్టీ సైతం వ్యూహాత్మకంగా ప్రచారం సాగించింది. అధికారంలోకి వస్తే కొద్ది కాలంలోనే అవినీతిని పూర్తిగా నిర్మూలిస్తామని.. ఢిల్లీ మున్సిపల్ కార్పొరేషన్ ప్రాంతాన్ని పారిస్, న్యూయార్క్‌ల మాదిరిగా మారుస్తామని హామీ ఇచ్చింది.

ఇక, కాంగ్రెస్‌ పరిస్థితిలో ఏమాత్రం మార్పు లేదని ఎగ్జిట్ పోల్స్ అంచనాలు పేర్కొన్నాయి. 2019లో షీలా దీక్షిత్ మరణించిన తర్వాత ఢిల్లీలో కాంగ్రెస్ పార్టీ పరిస్థితి క్రమంగా దిగజారిపోయింది. కాగా, 2017 ఎన్నికల్లో బీజేపీ మొత్తం 181 డివిజన్లు, ఆప్ 48, కాంగ్రెస్ 30 డివిజన్లలో విజయం సాధించాయి.

Read Latest National News And Telugu News