జయ కూతురినంటూ పిటిషన్‌.. అమృతపై సుప్రీంకోర్టు ఆగ్రహం

జయలలిత వారసురాలినంటూ సుప్రీంకోర్టును ఆశ్రయించిన మహిళకు చుక్కెదురైంది. తాను జయలలిత కుమార్తెనేనని, కావాలంటే తనకు డీఎన్‌ఏ పరీక్ష నిర్వహించవచ్చునని బెంగళూరు చెందిన అమృత సారథి అలియాస్ మంజుల (37) అనే మహిళ సర్వోన్నత న్యాయస్థానంలో పిటిషన్‌ దాఖలు చేసిన విషయం తెలిసిందే. సుప్రీంకోర్టు సోమవారం (నవంబర్ 27) ఆమె పిటిషన్‌ను తిరస్కరించింది. కర్ణాటక హైకోర్టుకు వెళ్లకుండా నేరుగా సుప్రీంకోర్టు ఎందుకొచ్చారంటూ న్యాయస్థానం ఆగ్రహం వ్యక్తం చేసింది.

తమిళనాడు మాజీ ముఖ్యమంత్రి జయలలిత వారసురాలిని తానేనని నవంబర్ 22న అమృత సుప్రీంకోర్టులో పిటిషన్ వేశారు. ‘నేను జయలలిత కూతుర్నే. జయలలిత సోదరి నన్ను పెంచి పెద్ద చేశారు. జయలలిత మృతి చెందిన తర్వాత నాకు ఈ రహస్యాన్ని చెప్పారు’ అని ఆమె పేర్కొంది.

గత ఏడాది డిసెంబర్‌లో అనారోగ్యంతో ప్రాణాలు విడిచిన జయలలిత జీవితాంతం పెళ్లి చేసుకోకుండా అవివాహితగానే ఉన్నారు. ఆమె వ్యక్తిగత జీవితం గురించి ఎవరికీ పెద్దగా తెలియదు. ఈ నేపథ్యంలో జయ మృతి చెంది ఏడాది కావస్తున్న తర్వాత కూడా ఆమె వారసులం తామంటే తామేనంటూ.. పలువురు ముందుకొస్తుండటం గమనార్హం.