ఢిల్లీ లెఫ్ట్‌నెంట్ గవర్నర్‌గా బైజాల్ ప్రమాణం

ఢిల్లీ కొత్త లెఫ్ట్‌నెంట్ గవర్నర్‌గా కేంద్ర హోం శాఖ మాజీ కార్యదర్శి అనిల్ బైజాల్ శనివారం ప్రమాణ స్వీకారం చేసారు. ప్రస్తుతం ఆయన వయసు 70 ఏళ్లు. వ్యక్తిగత కారణల వల్ల లెఫ్ట్‌నెంట్ గవర్నర్ పదవికి రాజీనామా చేసిన నజీం జంగ్ స్థానంలో బైజాల్ బాధ్యతలు స్వీకరించారు. నజీం జంగ్ రాజీనామాను డిసెంబర్ 28న ఆమోదించిన రాష్ట్రపతి ప్రణబ్ ముఖర్జీ అదే రోజు బైజాల్ నియామకానికి కూడా ఆమోదం తెలిపారు.

1969 బ్యాచ్‌కు చెందిన ఐఏఎస్ అధికారి అనిల్ బైజాల్ ఢిల్లీకి 20వ లెఫ్ట్‌నెంట్ గవర్నర్‌గా నియమితులయ్యారు. బైజాల్ గతంలో ఢిల్లీ డెవలప్‌మెంట్ అథారిటీకి వైస్ చైర్మన్‌గా కూడా పనిచేసారు. ప్రసార భారతి, ఇండియన్ ఎయిర్‌లైన్స్‌లో కూడా కీలక పదవులు చేపట్టారు. బైజాల్ అటల్ బిహారీ వాజ్‌పేయి ప్రభుత్వంలో హోం శాఖ కార్యదర్శిగా పనిచేసారు. అయితే యూపీఏ ప్రభుత్వం 2004 మే నెలలో ఆయన్ని పదవి నుంచి తొలగించింది.

కాగా, ఢిల్లీ ప్రభుత్వాన్ని నడిపిస్తున్న ఆమ్ ఆద్మీ పార్టీ, దాని అధినేత అరవింద్ కేజ్రీవాల్‌తో ఉన్న వివాదాల కారణంగా నజీబ్ జంగ్ డిసెంబర్ 22న లెఫ్ట్‌నెంట్ గవర్నర్ పదవికి రాజీనామా చేసిన విషయం తెలిసిందే.