మాట తప్పావ్, కేజ్రీవాల్‌ను తలంటిన అన్నా

సామాజిక ఉద్యమకారుడు అన్నా హజారే ఢిల్లీ ముఖ్యమంత్రి అరవింద్ కేజ్రీవాల్‌కు తలంటారు. ఆమ్ ఆద్మీ పార్టీ ప్రజలకు ఇచ్చిన హామీలను తుంగలో తొక్కిందని మండిపడ్డారు. హామీలతో జనాన్ని మోసే ఇతర పార్టీలకు కేజ్రీవాల్ పార్టీకి తేడా ఏంటని ఆయన సూటిగా ప్రశ్నించారు.

ఆప్‌కు చెల్లించే విరాళాలు, వాటి దాతల పేర్లు ప్రకటిస్తామని చెప్పిన అరవింద్ కేజ్రీవాల్ ఈయేడాది జూన్ నుంచి వారి పేర్లతో కూడిన జాబితాను పార్టీ వెబ్ సైట్ ను తొలగించడంపై అన్నా ఆగ్రహం వ్యక్తం చేశారు. ఆప్ విధానాలను నిరసిస్తూ ఆయన కేజ్రీవాల్ కు లేఖ రాశారు.

‘పార్టీకి వచ్చే విరాళాలు, దాతల పేర్లు ప్రకటిస్తానని మాటిచ్చావ్. జూన్, 2016 నుంచి దాతల పేర్లతో కూడిన లిస్టును పార్టీ వెబ్ సైట్ నుంచి తొలగించారు. సమాజంలో మార్పు తెస్తానని ప్రామిస్ చేశావ్. నీవు నీ మాట నిలుపుకోనందుకు ఆవేదనగా ఉంది’ అని అన్నా తన లేఖలో ఘాటుగా మండిపడ్డారు.

అయితే అన్నా రాసిన తమ అధినేతకు రాసిన లేఖను కాంగ్రెస్, బీజేపీ నేతలు తప్పుదోవ పట్టిస్తున్నారని, దానిపై తప్పుడు ప్రచారాలు చేస్తున్నారని ఆప్ నేతలు పేర్కొన్నారు. తమపార్టీకి వచ్చే నిధుల్లో 92శాతం మేర చెక్కులు, బ్యాంకింగ్, డెబిట్, క్రెడిట్ కార్డుల ద్వారా పారదర్శకంగా వస్తున్నాయని అంటున్నారు.