రిపబ్లిక్ డే వేడుకలు: ఉగ్రకుట్ర భగ్నం.. దేశవ్యాప్తంగా హైఅలర్ట్

గణతంత్ర దినోత్సవ సందర్భంగా ఉగ్రవాదులు దాడులకు పాల్పడే అవకాశం ఉందన్న నిఘా వర్గాలు హెచ్చరికలతో దేశవ్యాప్తంగా హైఅలర్ట్ ప్రకటించారు. దేశ రాజధాని ఢిల్లీలో దాడుల కుట్రను పోలీసులు భగ్నం చేశారు. ఢిల్లీలోని లజ్‌పత్ నగర్, పహర్‌గంజ్, ఇండియా గేట్, హజ్ మంజల్, తుర్కమన్ గేట్, జామా మసీదు, పాలికా బజారులో బాంబు పేలుళ్లతోపాటు తూర్పు ఢిల్లీలోని ఓ గ్యాస్ పైప్‌లైన్ లక్ష్యంగా దాడులకు వ్యూహరచన చేసినట్టు రెండు రోజుల కిందట జైషే మహ్మద్ ఉగ్రవాదులను పోలీసులు అదుపులోకి తీసుకుని విచారించినప్పుడు బయటపడింది. ఈ ప్రాంతాల్లో రెక్కీ కూడా నిర్వహించినట్టు వెల్లడయ్యింది. దీంతో ఢిల్లీతోపాటు దేశవ్యాప్తంగా భద్రతను కట్టుదిట్టం చేశారు. మహిళా విభాగానికి చెందిన స్వాత్ కమాండోలు, మొబైల్ హిట్ టీమ్, స్కిప్పర్ డాగ్‌లతో ఢిల్లీ చుట్టూ పహారా కాస్తున్నారు. అలాగే యాంటీ-ఎయిర్‌క్రాఫ్ట్ గన్స్ కూడా వినియోగిస్తున్నారు.

కాగా, 70వ గణతంత్ర దినోత్సవం..మరోవైపు బాపూజీ 150వ జయంతి ఉండడంతో ఈసారి వేడుకలను ఘనంగా నిర్వహించాలని కేంద్రం నిర్ణయం తీసుకుంది. అందుకనుగుణంగా ఏర్పాట్లు చేసింది. రాష్ట్ర ప్రభుత్వ కార్యాలయాలను విద్యుత్ దీపాలతో అలంకరించారు. గాంధీని స్మరించుకొనేలా కార్యక్రమాలకు సన్నాహాలు చేశారు. గాంధీజీ జీవిత విశేషాలను తెలియజేసేలా 17 రాష్ట్రాలు రూపొందించిన శకటాలను రిపబ్లిక్ డే వేడుకల్లో ప్రదర్శనకు సిద్ధమయ్యాయి. వీటిలో కేంద్రం రూపొందించిన 6 శకటాలు కూడా ఉన్నాయి. విజయ్ చౌక నుంచి ఎర్రకోట వరకు పరేడ్ నిర్వహించనున్నారు. ఈ సందర్భంగా ఎలాంటి అవాంఛనీయ ఘటనలకు తావులేకుండా పోలీసులు భారీ బందోబస్తు ఏర్పాటు చేశారు. ఢిల్లీ వ్యాప్తంగా భద్రతను కట్టుదిట్టం చేసి, ముమ్మరంగా వాహనాలను తనిఖీలు చేపట్టారు. అనుమానం వచ్చిన వారిని అదుపులోకి తీసుకుని ప్రశ్నిస్తున్నారు.

ఈ ఏడాది గణతంత్ర దినోత్సవ వేడుకలకు దక్షిణాఫ్రికా అధ్యక్షుడు, బ్రిక్స్‌ దేశాల భాగస్వామి సిరిల్‌ రాంపోసా ముఖ్య అతిథిగా హాజరవుతున్నారు. ఈ సందర్భంగా రాష్ట్రపతి, ప్రధానమంత్రి, విదేశీ అతిథుల కోసం ప్రత్యేకంగా బుల్లెట్ ప్రూఫ్ గ్యాలరీలు ఏర్పాటు చేశారు.