గణపతి ఉత్సవాల్లో విషాదం: డ్యాన్స్ చేస్తూ స్టేజ్‌పైనే కుప్పకూలిపోయిన ఆర్టిస్ట్

నృత్యప్రదర్శన విషాదంగా మారింది. వేదికపై నృత్యం చేస్తుండగా ఓ కళాకారుడు గుండెపోటుతో కుప్పకూలిపోయాడు. నృత్యం చేస్తూ గుండెపోటుతో వేదికపైనే కూలబడిపోవడంతో ప్రదర్శనలో భాగంగానే ప్రేక్షకులు భావించారు. కొద్ది నిమిషాల వరకూ ఎవరూ స్పందించలేదు. కొద్ది సేపటి తర్వాత శివుడి వేషధారణలో ఉన్న మరో ఆర్టిస్ట్ వేదికపైకి వెళ్లి చూడగా స్పందన లేకుండా పడి ఉన్నాడు. దీంతో పైకి లేపడానికి ప్రయత్నించాడు. స్పృహ‌తప్పిపోవడంతో వెంటనే అక్కడ ఉన్నవాళ్లు చేరుకుని వైద్యం కోసం ఆస్పత్రికి తరలించారు. అయితే, అప్పటికే చనిపోయినట్టు వైద్యులు ధ్రువీకరించారు. విషాదకర ఈ ఘటన జమ్మూలో చోటుచేసుకుంది.

ప్రస్తుతం ఈ వీడియో సోషల్ మీడియాలో వైరల్‌గా మారింది. జమ్మూలోని బిష్ణా ప్రాంతం కోథే గ్రామంలోని వినాయక మండపం వద్ద బుధవారం సాంస్కృతిక కార్యక్రమాలను ఏర్పాటుచేశారు. ఇందులో భాగంగా శివపార్వతుల నృత్య ప్రదర్శన జరుగుతున్న సమయంలో ఈ ఘోరం జరిగింది. పార్వతి వేషధారణలో ఉన్న యోగేశ్ గుప్తా అనే 20 ఏళ్ల కళాకారుడు.. సంగీతానికి అనుగుణంగా నృత్యం చేస్తున్నాడు. నృత్యాన్ని తిలకిస్తూ ప్రేక్షకులు ప్రదర్శనలో లీనమైపోయారు. కొద్ది సేపటి తర్వాత ఉన్నట్టుండి వేదికపై కుప్పకూలిపోయాడు.


అయితే, అక్కడ ఉన్నవారంతా ఇది కూడా ప్రదర్శనలో భాగమని భావించారు. అయితే, శివుడి వేషధారణలో ఉన్న మరో కళకారుడు గమనించి వెంటనే యోగేశ్ వద్దకు వెళ్లి లేపే ప్రయత్నం చేయగా అప్పటికే స్పృహ‌ కోల్పోవడం అచేతనంగా ఉన్నాడు. వెంటనే పక్కన ఉన్నవారి సాయంతో చికిత్స కోసం ఆస్పత్రికి తరలించారు. యోగేశ్‌ను పరీక్షించిన వైద్యులు చనిపోయినట్టు ధ్రువీకరించారు. గుండెపోటుకు గురైనట్టు ప్రాథమికంగా నిర్ధారించారు.

కాగా, ఇటీవల కాలంలో ఇటువంటి ఘటనలు దేశంలో పలు చోటుచేసుకుంటున్నాయి. గత జూన్‌లో సింగర్ కేకే కలకత్తాలో ప్రదర్శన కోసం రిహార్సిల్స్ చేస్తుండగా కార్డియాక్ అరెస్ట్‌కు గురై చనిపోయాడు. దీనికి సంబంధించిన వీడియోలు సోషల్ మీడియాలో వైరల్ అయ్యాయి. మే 28న ప్రముఖ మలయాళ గాయకుడు ఈద్వా బషీర్ కూడా అలప్పూజలో సంగీత కచేరీ చేస్తుండగానే గుండెపోటుతో కన్నుమూశారు.