వీడియో: నిప్పులు చిందే కవిత.. అటల్‌జీ ఆణిముత్యం ఇదిగో!

ప్రత్యర్థులతోనూ ప్రశంసలు అందుకున్న గొప్ప వ్యక్తిత్వం వాజ్‌పేయికే సొంతం. రాజకీయాల్లో ఆయన అజాతశత్రువు. అద్భుతమైన దార్శనికుడు, గొప్ప వక్త, కవి, రచయిత, మంచి పాలకుడు. వివాహాన్ని కూడా వదిలేసి జీవితాన్ని మొత్తం దేశ సేవకే అంకింతం చేసిన ధన్యజీవి. నమ్మిన మిత్రులు మోసం చేసినా చిరునవ్వుతో క్షమించేసిన ధీశాలి. పాకిస్థాన్‌కు స్నేహహస్తం అందించిన అసమాన నేత.. తేడా వచ్చినప్పుడు అదే పాక్‌కు యుద్ధంతో గట్టి సమాధానం చెప్పిన తిరుగులేని నాయకుడు.

ప్రపంచంలోనే అతిపెద్ద ప్రజాస్వామ్య దేశానికి ప్రధానిగా బాధ్యతలు నిర్వహిస్తూ.. రాజకీయాల్లో నిత్యం తలమునకలుగా ఉన్నా.. వాజ్‌పేయి తనకు ఇష్టమైన కవితా వ్యాసాంగాన్ని మాత్రం వదలిపెట్టలేదు. పార్లమెంటు లోపల, బహిరంగ సభల్లో, పార్టీ సమావేశాల్లో, ఇతర సందర్భాల్లో తనకే సొంతమైన కవితలు, ఛలోక్తులతో సభికులను రంజింపజేసేవారు.

భారత్-పాక్ సంబంధాల విషయంలో వాజ్‌పేయికి ఉన్న స్పష్టత మరే ఇతర నాయకుడికి లేదనే చొప్పొచ్చు. ఆయన తీసుకున్న నిర్ణయాలు అనితర సాధ్యం. పాక్‌కు చిరునవ్వుతో స్నేహహస్తం అందించినా.. దాన్ని పాక్ ప్రభుత్వం అడ్డంగా నరికేసి కార్గిల్ రూపంలో మారణహోమానికి తెగబడినా.. చెరగని చిరునవ్వుతోనే ఎదుర్కొన్నారు తప్ప కుంగిపోలేదు. భారత్-పాక్ సంబంధాలపై పలు సందర్భాల్లో వాజ్‌పేయి అనేక కవితలు చెప్పారు. అటల్‌జీ మాటల్లోని ఓ అరుదైన ఆణిముత్యం ఇదిగో..