Shraddha Murder Case: ఆఫ్తాబ్ పూనావాలాపై దాడి... వాహనంలో తరలిస్తుండగా కత్తులతో...

శ్రద్ధా వాల్కర్ హత్య కేసులో నిందితుడైన ఆఫ్తాబ్ పూనావాలాపై దాడి జరిగింది. ఢిల్లీలోని రోహిణిలో FSL ల్యాబ్‌ నుంచి బయటకు తీసుకొచ్చి.. వాహనంలో తరలిస్తుండగా ఈ ఘటన చోటుచేసుకుంది. ఆఫ్తాబ్ పూనావాలాను పాలిగ్రాఫ్ పరీక్ష కోసం సోమవారం రోహిణిలోని ఫోరెన్సిక్ సైన్స్ ల్యాబ్‌కు తీసుకెళ్లారు. అది పూర్తయ్యాక.. అక్కడ నుంచి జైలుకు తరలించేందుకు పోలీసులు వాహనం ఎక్కించారు. ఆ సమయంలో కొంతమంది యువకులు కత్తులతో ఆఫ్తాబ్‌పై దాడికి ప్రయత్నించారు. పోలీసు వ్యాన్‌ను బద్దలు కొట్టడానికి ప్రయత్నాలు చేశారు. ఇద్దరు వ్యక్తులు వాహనాన్ని అడ్డుకుని ఆపడానికి కూడా ట్రై చేశారు. కానీ పోలీసులు వారిని నిలువరించారు. సంచలన కేసు...
తనతో సహజీవనం చేసిన శ్రద్ధా వాల్కర్‌ని.. అఫ్తాబ్ వాల్కర్‌ని అతి కిరాతకంగా హత్య చేశాడు. 35 ముక్కలుగా చేసి.. ఫ్రిజ్‌లో పెట్టి.. ఆపై వాటిని వేర్వేరు ప్రాంతాల్లో విసిరేశాడు. అయితే ఆరు నెలల తర్వాత ఈ విషయం బయటకొచ్చింది. శ్రద్ధా వాల్కర్ తండ్రి ఫిర్యాదుతో రంగంలోకి దిగిన పోలీసులు దర్యాప్తు చేయడంతో.. మొత్తం విషయం బయటకొచ్చింది. వెంటనే అఫ్తాబ్‌ను పోలీసులు అదుపులోకి తీసుకున్నారు. కోర్టులో కూడా అఫ్తాబ్ తన నేరాన్ని అంగీకరించాడు.

ఈ క్రమంలో అఫ్తాబ్‌ను పోలీసులు సుదీర్ఘంగా విచారిస్తున్నారు. ఈ క్రమంలో సోమవారం అఫ్తాబ్‌కు పాలీగ్రాఫ్ ప‌రీక్ష నిర్వహించారు. శ్ర‌ద్ధాను ముక్క‌లు చేసేందుకు అత‌ను ఐదు కత్తులు వాటినట్టు ఆ పరీక్షలో వెల్లడించినట్టు తెలు్సతుంది. ఆ కత్తులను కూడా పోలీసులు గుర్తించినట్టు తెలుస్తుంది.

పాలిగ్రాఫ్ టెస్ట్...
పాలిగ్రాఫ్ టెస్ట్‌నే లై డిటెక్టర్ టెస్ట్ అని కూడా అంటారు. నిందితుల నుంచి నిజాలు రాబట్టేందుకు దీనిని వాడుతుంటారు. పోలీసులు అడిగిన ప్రశ్నలకు నిందితులు సమాధానాలు చెప్పేటప్పుడు వారి శరీరం ఎలా స్పందిస్తోందన్నది మెషిన్ గుర్తిస్తుంది. బీపీ, గుండె కొట్టుకునే రేటు, శ్వాస వేగాన్ని మెషిన్ గమనిస్తుంది. ఆ క్రమంలో నిందితుడు అబద్ధం చెబుతున్నాడో.. నిజం చెబుతున్నాడో తెలుసుకునే ఛాన్స్ ఉంటుంది. ఈ పరీక్షలో ఎలాంటి మత్తు మందులు ఉపయోగించరు.