ఒంటికి నిప్పు పెట్టుకున్న అయ్యప్ప భక్తుడు.. కేరళలో కలకలం

అయ్యప్ప భక్తుడి ఆత్మహత్యాయత్నం కేరళలో కలకలం రేపుతోంది. తిరువనంతపురంలో కేరళ సచివాలయం సమీపంలో అయ్యప్ప భక్తుడొకరు తన ఒంటిపై కిరోసిన్ పోసుకొని నిప్పంటిచున్నాడు. అక్కడే నిరసన తెలుపుతున్న బీజేపీ నాయకుల శిబిరానికి సమీపంలో ఈ ఘటన చోటుచేసుకోవడం వివాదాస్పదంగా మారింది. మంటల్లో కాలుతూ ‘స్వామి శరణం’ అంటూ నినాదాలు చేస్తూ.. తమవైపు దూసుకొస్తున్న వ్యక్తిని చూసి బీజేపీ కార్యకర్తలు భయాందోళనకు గురయ్యారు. ఈ దారుణానికి ఒడిగట్టిన వ్యక్తిని వేణుగోపాలన్ నాయర్ (49)గా గుర్తించారు.

శబరిమల అయ్యప్ప సన్నిధానానికి 10 నుంచి 50 ఏళ్ల మహిళలను అనుమతిస్తూ సుప్రీంకోర్టు ఇటీవల ఇచ్చిన తీర్పుపై కేరళలో నిరసనలు పెద్ద ఎత్తున చెలరేగుతున్న విషయం తెలిసిందే. ఈ అంశంలో కేరళ ప్రభుత్వ వైఖరికి నిరసనగా అయ్యప్ప భక్తులతో పాటు బీజేపీ, కాంగ్రెస్‌కు చెందిన నేతలు, కార్యకర్తలు కూడా ఆందోళనలు చేస్తున్నారు. ఈ క్రమంలో బుధవారం (డిసెంబర్ 12) అర్ధరాత్రి దాటాకా.. బీజేపీ నేతలు కేరళ సర్కారుకు వ్యతిరేకంగా ఆ రాష్ట్ర సచివాలయం ముందు నిరసన కొనసాగించారు.

సరిగ్గా ఈ సమయంలో వేణుగోపాలన్ నాయర్ తన ఒంటిపై కిరోసిన్ పోసుకొని నిప్పంటించుకున్నాడు. ఊహించని ఈ పరిణామంతో అక్కడున్న వారంతా షాక్‌కు గురయ్యారు. కేరళలోని ముట్టాడ ప్రాంతానికి చెందిన వేణుగోపాలన్ నాయర్.. కొంతకాలంగా శబరిమల అంశంపై జరుగుతున్న ఆందోళనల్లో చురుగ్గా పాల్గొంటున్నట్లు తెలుస్తోంది.


వేణుగోపాలన్ ఆత్మహత్యాయత్నం ఘటనపై కేరళలో వివాదాలు చెలరేగాయి. మద్యం మత్తులో వేణుగోపాలన్ ఇలా చేశాడంటూ కొంత మంది ఆరోపిస్తున్నారు. కుటుంబ కలహాల కారణంగానే ఆయన ఈ దారుణానికి ఒడిగట్టాడని మరికొంత మంది ఆరోపిస్తున్నారు. వేణుగోపాలన్ అయ్యప్ప భక్తుడని.. శబరిమలలో కొంతకాలంగా జరుగుతున్న పరిణామాల నేపథ్యంలో మనస్తాపానికి గురై అతడు ఆత్మహత్యాయత్నానికి పాల్పడ్డాని కేరళ బీజేపీ నేత పద్మనాభన్ తెలిపారు. కేసు నమోదు చేసుకున్న పోలీసులు వివిధ కోణాల్లో దర్యాప్తు చేస్తున్నారు.

తీవ్రంగా గాయపడిన వేణుగోపాలన్‌ను తిరువనంతపురంలోని ప్రభుత్వ ఆస్పత్రికి తరలించి చికిత్స అందిస్తున్నారు. 60 శాతం కాలిన గాయాలతో అతడు బాధ పడుతున్నాడు. వేణుగోపాలన్ ఆరోగ్య పరిస్థితి విషమంగా ఉందని వైద్యులు తెలిపారు.