బాబా రాందేవ్ ‘రికార్డు’ యోగా!

అంతర్జాతీయ యోగా దినోత్సవాన్ని పురష్కరించుకుని ప్రముఖ యోగా గురు బాబా రాందేవ్ గుజరాత్‌లోని అహ్మదాబాద్‌లో వేడుకలను నిర్వహించారు. నగరంలోని జీఎండీసీ మైదానంలో ఏర్పాటుచేసిన వేదికపై నుంచి భారీగా తరలివచ్చిన ఔత్సాహికులతో యోగాసనాలు వేయించారు. లక్షకుపైగా మంది ప్రజలతో యోగాసనాలు వేయించడం ద్వారా ప్రపంచ రికార్డు నెలకొల్పడానికి బాబా రాందేవ్ ప్రయత్నిస్తున్నారు. ఈ వేడుకలకు గిన్నిస్ వరల్డ్ రికార్డ్స్ ప్రతినిధులు కూడా హాజరయ్యారు.

ఈ సందర్భంగా బాబా రాందేవ్ మాట్లాడుతూ.. యోగా గుర్తింపునిస్తూ అంతర్జాతీయ యోగా దినోత్సవాన్ని నెలకొల్పిన ప్రధాన మంత్రి నరేంద్ర మోదీకి ధన్యవాదాలు తెలిపారు. యోగాతో ఇప్పటికే 22 ప్రపంచ రికార్డులు నెలకొల్పామని, ఈరోజు మరో రెండు రికార్డులు నెలకొల్పబోతున్నామని చెప్పారు. ఒక నిమిషంలో అత్యధిక పుష్ అప్‌లు, ఎక్కువ సమయంపాటు శీర్షాసనం వంటి రికార్డులను గతంలో బాబా రాందేవ్ ఆధ్వర్యంలో నెలకొల్పారు. కాగా, ఈ కార్యక్రమానికి బీజేపీ జాతీయ అధ్యక్షుడు అమిత్ షా, గుజరాత్ మాజీ సీఎం ఆనందీబెన్ పటేల్ హాజరయ్యారు. బాబా రాందేవ్‌తో కలసి యోగాసనాలు వేశారు.