సోనియా.. మీ సూచనను వెనక్కి తీసుకోండి: ఐఎన్ఎస్

ప్రభుత్వం మీడియాకు ఇచ్చే ప్రకటనలపై రెండేళ్ల నిషేధం విధించాలని ప్రధానికి సోనియా చేసిన సూచనను వెనక్కి ది ఇండియన్ న్యూస్ పేపర్స్ అసోసియేషన్ (ఐఎన్ఎస్) ఖండించింది. ఇంతకు ముందే న్యూస్ బ్రాడ్‌కాస్టర్స్ అసోసియేషన్.. ఇండియన్ బ్రాడ్‌కాస్టింగ్ ఫౌండేషన్ కూడా సోనియా సూచనను వ్యతిరేకించాయి. ఈ ప్రతిపాదనను వెనక్కి తీసుకోవాలని సోనియాకు విజ్ఞప్తి చేశాయి. సంక్షోభ సమయంలో మీడియా కీలక పాత్ర పోషిస్తున్న విషయాన్ని గుర్తు చేశాయి.

‘ప్రకటనల కోసం చేసే ఖర్చు ప్రభుత్వాలకు చాలా తక్కువ. కానీ న్యూస్ పేపర్ ఇండస్ట్రీకి మాత్రం ఇది చాలా పెద్ద మొత్తం. పత్రికలు మనుగడ సాగించడానికి మీడియాకు ప్రకటనల రూపంలో వచ్చే ఆదాయం అవసరం’ అని ఐఎన్ఎస్ తెలిపింది. మీడియా బలంగా ఉంటేనే ప్రజాస్వామ్యం బలంగా ఉంటుందని పేర్కొంది. ప్రింట్ మీడియాకు మాత్రమే వేజ్ బోర్డ్ ఉందని.. ఉద్యోగులకు వేతనాలు ఎంత మొత్తం చెల్లించాలో ప్రభుత్వం నిర్ణయిస్తుందని ఐఎన్ఎస్ గుర్తు చేసింది. ఆర్థిక మాంద్యం, డిజిటల్ మీడియా పెరిగిపోవడం వల్ల ప్రింట్ మీడియా ఇబ్బందులు ఎదుర్కొంటోందని.. కరోనా వైరస్, లాక్‌డౌన్ దీన్ని మరింత ఎక్కువ చేసింది ఐఎన్ఎస్ తెలిపింది. ప్రింట్ మీడియా ప్రభావవంతమైన మాధ్యమంగా.. దేశం నలుమూలలకు వార్తలను తీసుకెళ్తుందని ఐఎన్ఎస్‌ ప్రకటనలో పేర్కొంది.

కరోనా మహమ్మారి విజృంభిస్తోన్న తరుణంలోనూ మీడియా ప్రతినిధులు తమ ప్రాణాలను ఫణంగా పెట్టి వార్తలను అందిస్తున్నారు. కానీ సోనియా ఇచ్చిన సలహా తీవ్రంగా డిస్ట్రబ్ చేసింది, మీడియా ఇండస్ట్రీ మొత్తాన్ని నిరాశకు గురి చేసిందని ఐఎన్ఎస్ తన ప్రకటనలో పేర్కొంది. మీడియా ప్రకటనలపై పూర్తి నిషేధం విధించాలని ప్రధానికి ఇచ్చిన సూచనను వెనక్కి తీసుకోవాలని సోనియా గాంధీని ఐఎన్ఎస్ కోరింది.

కరోనా సంక్షోభం నుంచి గట్టెక్కడం కోసం ప్రధాని మోదీ మాజీ ప్రధానులు, మాజీ రాష్ట్రపతులు, రాజకీయ నాయకులను సూచనలు కోరారు. దీనికి స్పందించిన సోనియా ప్రధానికి ఐదు సలహాలు ఇచ్చారు. ఇందులో మీడియాకు ప్రకటనలపై రెండేళ్ల నిషేధం విధించడం అనేది ఒకటి. మీడియా ప్రకటనల కోసం మొత్తాన్ని ఆదా చేయడం ద్వారా పేదలకు సంక్షేమ పథకాలకు నిధులు సమకూర్చవచ్చని సోనియా సూచించారు.