పూజారి సమక్షంలో అర్ధనగ్నంగా బాలికలతో పూజలు

తమిళనాడులోని మధురైలో అమలులో వున్న ఓ వింత ఆచారం ఇప్పుడు సోషల్ మీడియాలో వైరల్ అయింది. మధురైలోని ఓ దేవాలయంలో ఏడాదికొకసారి జరిగే వార్షిక ఉత్సవాలలో వెలుగుచూసిన ఈ వింత ఆచారంపై సర్వత్రా విమర్శలు వ్యక్తమవుతున్నాయి. ఇక్కడి దేవాలయంలో జరిగే ఉత్సవాలలో కొంతమంది బాలికలకి నడుంపై భాగంలో శరీరంపై ఎటువంటి అచ్చాదన లేకుండా దాదాపు 15 రోజులపాటు ఓ పూజారి సమక్షంలో ప్రత్యేక పూజలు చేయిస్తున్న వైనం గురించి తెలుసుకున్న జిల్లా అధికార యంత్రాంగం ఈ ఘటనపై విచారణకు ఆదేశించింది. ఛాతిపై కేవలం కొన్ని నగలని మాత్రమే ధరించి 15 రోజులపాటు దేవాలయంలోనే పూజారి సమక్షంలో పూజల్లో పాల్గొనే ఈ బాలికలని అక్కడి గ్రామస్తులు దేవతల్లా భావించడం అనేది అక్కడి ఆనవాయితీ.

ప్రతీ ఏడాదిలాగే ఈ ఏడాది కూడా జరిగిన ఉత్సవాల్లో భాగంగా ఏడుగురు బాలికలని అలా ఓ పూజారితో కలిసి పూజలు చేయించిన వైనాన్ని ది కోవై పోస్ట్ అనే న్యూస్ పోర్టల్ వార్తల్లో ప్రసారం చేసింది. బాలికలు పూజల్లో పాల్గొనడం, అలాగే దేవాలయం ఆవరణలోని కొలనులో ప్రత్యేక స్థానాలు ఆచరించిన తీరుని ఆ న్యూస్ పోర్టల్ ప్రసారం చేయడంతో విషయం కాస్తా స్థానిక అధికార యంత్రాంగం దృష్టికి వెళ్లింది. దీంతో ఆ బాలికల యోగక్షేమాలు, పూజల నియమాలపై ఆరాతీస్తూ జిల్లా కలెక్టర్ కే వీర రాఘవ రావు విచారణకు ఆదేశించారు. ముఖ్యంగా ఈ పూజల పేరిట బాలికలపై ఏమైనా లైంకిగ దాడులు జరిగాయా అనే కోణంలో కలెక్టర్ విచారణ జరిపించారు.

ఈ ఘటనపై విచారణ అనంతరం మీడియాతో మాట్లాడిన కలెక్టర్... ఈ ఉత్సవాల్లో పాల్గొనే బాలికలని వారి తల్లిదండ్రులే తమ ఇష్టపూర్తిగా దేవాలయానికి పంపిస్తారని, అది కూడా ప్యూబర్టీ దశకు చేరనివారినే (బహిస్టు కాని బాలికలు)లనే దేవాలయంలోకి అనుమతిస్తారని స్థానిక అధికారుల విచారణలో తేలిందని అన్నారు.

ఆ బాలికలని తాము దేవతలుగా భావిస్తామని స్థానికులు అధికారులకి చెప్పారని, బాలికలపై ఎటువంటి లైంగిక దాడులు జరగలేదని తమ విచారణలో స్పష్టమైందని జిల్లా కలెక్టర్ మీడియాకు తెలిపారు. ఏదేమైనా బాలికలకి అలా ఒంటిపై బట్టలు లేకుండా అర్థనగ్నంగా పూజలు జరిపే ఆనవాయితీకి స్వస్తి పలకాలని అక్కడి గ్రామస్తులకి సూచించినట్టు కలెక్టర్ చెప్పారు.