బెంగుళూరు వేధింపుల కేసు: నలుగురు అరెస్ట్

బెంగుళూరులోని కమ్మనహల్లి ప్రాంతంలో జనవరి 1వ తేదీన ఓ యువతిని ఒంటరిగా వేధించిన ఘటనకి సంబంధించి ఆరుగురు నిందితులలో నలుగురిని బెంగుళూరు పోలీసులు అరెస్ట్ చేశారు. ఆరోజు రాత్రి ఈ కీచకపర్వాన్ని రికార్డ్ చేసిన సీసీటీవీ కెమెరాతోపాటు మరో 4 ఇతర సీసీటీవీ కెమెరాల ఫుటేజీని పరిశీలించిన అనంతరం ఈ నలుగురు నిందితులని అరెస్ట్ చేసినట్టు పోలీసులు తెలిపారు. అయ్యప్ప, లెనో, సోమశేఖర్ అలియాస్ చిన్ని, సుదేష్‌లని అరెస్ట్ చేసిన పోలీసులు మరో ఇద్దరి కోసం గాలింపు మొదలుపెట్టారు. అయ్యప్పతోపాటు మరొక ఐటీఐ విద్యార్థిని ఈ ఘటనకు ప్రధాన నిందితులుగా పోలీసులు గుర్తించారు.

ఈ ఘటన జరిగిన రోజు రాత్రి రోడ్డు పక్కనే పార్టీచేసుకుంటున్న నిందితులకి అప్పుడే అటుగా ఆటో దిగి ఇంటికి వెళ్తున్న బాధిత యువతి కనిపించింది. బాధితురాలి ఇంటికి సమీపంలోనే వుంటున్న నిందితులలో ఒక వ్యక్తి ఆమెని గుర్తుపట్టాడు. ఆరోజుకన్నా ముందు నుంచే ఆమెని గమనిస్తూ వస్తున్న నిందితులు ఆ చీకటిలో ఆమెని ఫాలో అయ్యారు. నిర్జన ప్రదేశంలో ఆమెని వేధించి పరారయ్యారు అని సిటీ పోలీస్ కమిషనర్ ప్రవీణ్ సూద్ ఈ ఘటనకి సంబంధించిన వివరాలు వెల్లడించారు.

అరెస్టుల అనంతరం బాధితురాలితో టచ్‌లోకి వచ్చిన పోలీసులు ఆమె నుంచి మరిన్ని వివరాలు రాబట్టేందుకు ప్రయత్నిస్తున్నట్టు తెలిపారు. ఎప్పటికప్పుడు బాధితురాలిని సంప్రదించి దర్యాప్తుని మరింత ముందుకు తీసుకువెళ్తున్న పోలీసులు త్వరలోనే ఐడెంటిఫికేషన్ పెరేడ్ కూడా ఏర్పాటు చేయనున్నట్టు సమాచారం.