బెంగళూరు చరిత్రలో కనీవిని ఎరుగని వర్షమిది..!

బెంగళూరు నగర ప్రజలంతా ఆదమరిచి నిద్రపోతుండగా.. సోమవారం రాత్రి భారీ వర్షం ముంచెత్తింది. మంగళవారం ఉదయం నిద్రలేచి చూసే సరికి నగరంలోని పలు లోతట్టు ప్రాంతాలు నీటమునిగిపోయాయి. 1890 తర్వాత.. గత 127 ఏళ్లలో ఎన్నడూ కురవని రీతిలో సోమవారం రాత్రి 128.7 మిల్లీ మీటర్ల వర్షపాతం నమోదైంది. ఆగష్టు నెలలో సోమవారం వరకూ ఆ నగరంలో కురిసింది కేవలం 44.8 మి.మీ. వర్షం మాత్రమే కాగా, 15 రోజుల్లో కురిసిన వర్షం కంటే 88 శాతం అధిక వర్షపాతం రాత్రి 11 గంటల నుంచి మంగళవారం ఉదయం 4 గంటల మధ్యలో నమోదైంది.

1890లో ఆగష్టు 27న బెంగళూరులో 162.1 మి.మీ. వర్షపాతం నమోదైంది. కాగా, సోమవారం రాత్రి 184 మి.మీ. వర్షం కురిసిందని కర్ణాటక ప్రభుత్వం చెబుతోంది. ఈ భారీ వర్షం ధాటికి బెలందూరు చెరువు పొంగి పొర్లింది. 40కిపైగా రెస్క్యూ బోట్లతో వరదలో చిక్కుకుపోయిన వారిని సురక్షిత ప్రాంతాలకు తరలించారు. పలు కాలనీల్లోకి పాములు చొరబడటంతో స్థానికులు భయాందోళనకు గురయ్యారు. భారీ వర్షాలతో రోడ్లన్నీ జలమయం కాగా.. స్వాతంత్ర్య దినోత్సవం కావడంతో.. సెలవు కాబట్టి ట్రాఫిక్ జాం సమస్య తప్పింది.