‘50 శాతం మరణాలను తగ్గించాం.. లాక్ డౌన్‌పై ఇలా చేస్తే మేలు..’

దేశంలో లాక్ డౌన్‌ను ఒకేసారి పూర్తిగా తొలగించి.. జనాలను రోడ్లపై వచ్చేలా చేయడం మంచిది కాదని నిపుణులు అభిప్రాయపడ్డారు. కోవిడ్ 19కు సంబంధించి ప్రస్తుత పరిస్థితి, భవిష్యత్తులో అనుసరించాల్సిన వ్యూహంపై బెన్నెట్ యూనివర్సిటీ గురువారం గ్లోబల్ కాన్ఫరెన్స్‌ నిర్వహించింది. ఇందులో వివిధ రంగాలకు చెందిన నిపుణులు పాల్గొని ప్రసగించారు. ఈ సందర్భంగా నారాయణ ఆస్పత్రుల చైర్మన్ డాక్టర్ దేవిశెట్టి మాట్లాడుతూ.. దేశంలో లాక్ డౌన్ తొలగించిన తర్వాత కూడా సామాజిక దూరం (సోషల్ డిస్టెన్స్) పాటించాల్సి ఉంటుందని, దీని వల్ల కరోనా వైరస్ వ్యాప్తిని నిరోధించవచ్చని అభిప్రాయపడ్డారు.
కరోనా వైరస్ వల్ల ప్రస్తుతం ఆర్థిక రంగం తీవ్రంగా ప్రభావితమవుతుందని, కానీ ప్రాంతాల వారీగా మాత్రమే లాక్ డౌన్ నిబంధనలను సడలించాలని డాక్టర్ దేవిశెట్టి సూచించారు. లాక్ డౌన్ తొలగించినా హాట్ స్పాట్, రెడ్ జోన్ ప్రాంతాలను మాత్రం సీల్ చేసే ఉంచాల్సి ఉంటుందని, ఆ ప్రాంతాల్లో దశల వారీగా తొలగించాలని సూచించారు. అలాగే కరోనా వైరస్ తీవ్రంగా ప్రబలక ముందే లాక్ డౌన్ విధించడం వల్ల దాదాపు 50 శాతం మరణాల రేటును తగ్గించగలిగామని దేవిశెట్టి తెలిపారు. ఇదే పనిని ఇతర దేశాలు పాటించకపోవడం వల్లే ఆయా దేశాల్లో మరణాల శాతం పెరిగిందని చెప్పారు.

ఆలిండియా ఇన్‌స్టిట్యూట్ ఆఫ్ మెడికల్ సైన్సెస్ (ఎయిమ్స్) డైరెక్టర్ రన్‌దీప్ గులేరియా మాట్లాడుతూ.. రాబోయే మరికొన్ని వారాలపాటు క్లిష్ట పరిస్థితులేనని, అయితే ముందుగానే లాక్ డౌన్ ప్రకటించడం ఎంతో మేలు చేసిందని చెప్పారు. అయితే ఇప్పటికిప్పుడు లాక్ డౌన్ తొలగించాలా, కొనసాగించాలా అనే దాన్ని నిర్ధారించాలంటే మరింత సమాచారం కావాల్సి ఉందని తెలిపారు. కరోనాను ఎదుర్కొనేందుకు మరి కొన్ని నెలల పాటు పోరాడాల్సి ఉంటుందని స్పష్టం చేశారు.